O‘zbekistonlik yengilmas jangchi Mahmud Murodov O‘zbekiston fuqaroligini qo‘lga kiritdi.
Mahmud Murodov - butun jahonga mashhur, ko‘p yillardan beri O‘zbekiston vaChexiyaning eng yaxshi MMA jangchisi. U endi Amerikani ham zabt etmoqda. Uning jang qilish texnikasi Floyd Meyvezerni ham o‘ziga maftun qilgan.
«Alhamdulillah yana bir orzuim amalga oshdi. Muhtaram Prezidentimizga bizga bo‘lgan ishonchlari va qo‘llab-quvvatlashlari uchun alohida tashakkurimni izhor etaman. Shavkat Miromonovich, yurtimiz uchun qilayotgan ishlaringiz va bugun menga hadya qilgan ulkan quvonch uchun katta rahmat. Sizga va oilangizga uzoq umr tilayman! 26 yil davomida shu kun kelishiga shubha qilmagan edim, hech qachon o‘z ajdodlarimni va o‘zbek o‘g‘lon ekaninmni unutmaganman va bugun buni tasdiqlovchi hujjatni qo‘limga oldim. O‘z yurtimning haqiqiy fuqarosi sifatida uning sha’nini jahon miqyosida himoya qilishga va bayrog‘ini ko‘klarga ko‘tarib, o‘zbek sportchilarining qudratini har bir mamlakatga bildirishga qasamyod qilaman. Har bir inson orzu bilan yashaydi, meniki esa bugun ushaldi. Yana bir bor rahmat...»
Mahmud Murodov asli Tojikistonda tavallud topgan bo‘lib, ikki yoshida ota-onasi bilan O‘zbekistonga ko‘chib kelgan. Ko‘p yillardan beri jahon ringlarida O‘zbekiston bayrog‘ini yuqori ko‘tarib kelayotgan sportchi va nihoyat O‘zbekiston fuqaroligini olgani haqida o‘zining instagram tarmog‘idagi shaxsiy sahifasida xabar bergan. U o‘zining quvonchini yashirmay, Prezidentga minnatdorchiligini bildirgan va yana bir orzusi amalga oshganini ma’lum qilgan.
«Men O‘zbekiston Respublikasi fuqarolik pasportini olganimdan fahrlanaman va juda xursandman. Avvalgi qonunga asosan qochoqlar fuqarolikni olish uchun ariza topshira olmas edilar, lekin yangi qonunga ko‘ra bunga imkon tug‘ildi. Tahminan sakkiz oy oldin ariza topshirgan edim, va mana, nihoyat men rasman O‘zbekiston fuqarosiman. Rossiya, Ukraina va Armaniston menga o‘z fuqaroligini taklif qilgan, janglardaularning bayrog‘ini ko‘tarishimni xohlagan, lekin men doimo o‘zbekman deganman». Mahmud Murodov
Mahmud Murodov Myday jurnaliga bergan intervyusida o‘zini o‘zbek deb hisoblashi, lekin hali ham O‘zbekiston fuqaroligiga ega emasligi haqida ham gapirgan edi. Oradan ko‘p vaqt o‘tmay uning orzusi amalga oshdi va u endi O‘zbekistonning haqiqiy fuqarosi.
