Angliya premyer ligasi 1-turi doirasidagi bugunga belgilangan oxirgi uchrashuv o‘z poyoniga yetdi.
«Moline Stedium» o‘yingohida kechgan bahsda Angliya elitasiga qaytgan «Vulverxempton» «Everton»ni qabul qildi.
Uchrashuv dastlabki daqiqalaridanoq shiddatkor tarzda boshlandi va jamoalar galma-gal hujumlar bilan muxlislarni hayajonda ushlab turishdi. Mezbonlar yuqori ishtiyoq bilan harakatlangan bo‘lishsa, liverpulliklar tajribalariga tayangan holda nisbatan tejamkorroq futbol ko‘rsatishdi.
Shunday bo‘lsada birinchi golni aynan mehmonlar kiritishdi. Aniqrog‘i, 17-daqiqada burchakdan yetkazib berilgan to‘pdan so‘ng jarima maydoni ichida chaqqonroq harakat qilgan Risharlison hisobni ochishga muvaffaq bo‘ldi.
Mazkur goldan so‘ng o‘ziga ishonchi ortgan «Everton» ishonchli o‘yini bilan ajralib turgandi, biroq, 40-daqiqaga kelib jamoaning tajribali himoyachisi Fil Jagelka to‘pni to‘xtatishda qo‘pol xatoga yo‘l qo‘ydi va o‘z xatosini tuzatish payida raqibga nisbatan jiddiy tashlandi. Mazkur vaziyatda hakam mehmonlar vakilini maydondan chetlatdi.
Aynan shu vaziyatda yuzaga kelgan standart vaziyatni Ruben Nevesh ajoyib tarzda ijro etib, juda chiroyli gol bilan hisobni tenglashtirdi. Birinchi bo‘lim shunday voqealar bilan yakunlandi.
Ikkinchi bo‘lim ham xuddi birinchisi kabi jamoalarning galma-gal hujumlari ostida kechdi. Ayrim daqiqalarda «Vulverxempton» ustunlik qilsa, ayrim daqiqalarda bir kishi kam bo‘lishiga qaramay «Everton» yaxshiroq harakat qildi.
Hisob esa 67-daqiqaga kelib o‘zgardi. Tosun va Risharlison kombinasiyasi braziliyalik yosh futbolchining dubli bilan yakunlandi.
Ammo elitaning yangi mehmonlari iroda kuchini yana bir bor namoyish etib, bu golga ham javob qaytarishdi.
80-daqiqada Ruben Neveshning ideal pasini Raul Ximenes boshi bilan darvozaga joylab qo‘ydi.
Shu tariqa har ikki jamoa mavsum startini bittadan ochko bilan boshlashdi.
APL. 1-TUR
VULVERXEMPTON – EVERTON 2:2 (1:1)
11 avgust, «Moline Stedium»
Gollar: 0:1 – 17 Risharlison, 1:1 – 44 Ruben Nevesh, 1:2 – 67 Risharlison, 2:2 – 80 Ximenes.
Vulverxempton: Ruy Patrisiu, Koudi, Boli, Kastro (Ruben Vinagre, 76), Bennett, Diogu Jota, Moutinyu (Gibbs-Uayt, 85), Elder Koshta (Leo Bonatini, 71), Ruben Nevesh, Doerti, Ximenes.
Everton: Pikford, Jagelka, Beyns, Koulmen, Kin, Sigurdsson (Xolgeyt, 43), Guye, Uolkott, Shnayderlin, Risharlison (Din, 86), Tosun (Nyasse, 81).
Ogohlantirish: Risharlison (14).
Chetlatish: Jagelka (40).
