«Real» safidan joy olgan yosh iqtidor sohibi - Alvaro Odriosola «Santyago Bernabeu»ning faxriy lojasida o‘tkazilgan rasmiy tanishtiruv marosimidan so‘ng xushchaqchaq holda, o‘z taassurotlari bilan o‘rtoqlashdi.
Anjumanni klubning yangi a’zosiga hamrohlik qilgan faxriy Alvaro Arbeloa ochib berdi: «Bor kuch-mahoratini «Real»ga bag‘ishlashga tayyor turgan noyob iqtidor sohibini ommaga rasman tanishtirish - katta sharaf! Bu yerda ulkan zafarlarga erishishingga ishonamiz. O‘zingni xuddi uyingdagidek erkin his etishing uchun barcha sharoitlarni yaratamiz.
Umidvormanki, muxlislar ilk o‘yindayoq seni yoqtirib qolishadi. «Madrid»ga xush kelibsan, Alvaro, senga omad!» Shundan so‘ng navbat Odriosolaga berildi.
ILK TAASSUROT
- Hozir har qachongidan-da baxtliroqman. Chunki bugun azaliy orzum amalga oshdi - futbol olamining eng buyuk klubi safiga qo‘shildim. Hissiyotlarimni so‘z yordamida ifodalashga ojizman. Bunday voqea hayotda bir marta bo‘ladi. Shunday sharaf nasib etganidan baxtiyorman.
ZAFARLAR ORZUSI
- Avvalo, futbolchi va inson sifatida kamolotga erishish niyatidaman. Shuning barobarida mavjud sovrinlarga ega chiqishni ham xohlayman, albatta. «Real» tarkibida o‘ynash va muvaffaqiyatga erishish - har bir futbolchi uchun chin orzu. Demak, orzumni ro‘yobga chiqarish yo‘lida bor kuchimni ayamayman.
XULEN LOPETEGI BILAN HAMKORLIK
- «Madrid»da to‘p surish imkoniyati taqdim etilganidan behad mamnunman va buning uchun birinchi nav-batda, Xulen Lopetegiga minnatdorchilik bildiraman. Biz bugun ertalab uchrashdik va murabbiy menga ishonishini ta’kidlab, astoydil ter to‘kishim kerakligini uqtirdi. Zero, buyuk jamoada talab ham yuqori bo‘lishi tabiiy hol. Shunchaki, nomiga o‘ynash bilan uzoqqa borish mumkin emas. Lopetegi shaxsiy g‘oyalarini amalga tatbiq etishga usta murabbiy.
KUTILAYOTGAN ANIQ RAQOBAT
- «Madrid» safidan joy olgan har qanday futbolchi o‘ta kuchli raqobatga duch kelishi tayin. O‘ylashimcha, bu yerdagi asosiy raqobatchim - Dani Karvaxal. Men uchun ajoyib namuna, unga hurmatim baland. Pozisiya uchun kurash jarayonida bor mahoratimni ishga solaman. Menimcha, sog‘lom raqobat ham futbolchilar, ham jamoaga manfaat keltiradi.
«MADRID» - ZAVQ MANBAI
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
