Uchrashuvdan so‘ng tashkil etilgan matbuot anjumanida birinchi bo‘lib Ravshan Haydarov jurnalistlar savollariga javob qaytardi. Unga yarim himoyachi Ikrom Aliboyev hamrohlik qildi.

Ravshan Haydarov: Avvalo muxlislarimizni musobaqa startidagi yirik g‘alaba bilan tabriklamyan. O‘yin to‘liq nazoratimiz ostida o‘tdi. To‘p bilan ko‘proq muomilada bo‘ldik. Hisob ham shunga yarasha bo‘ldi. Birinchi o‘yindagi g‘alaba nihoyatda muhim edi. Buni uddalay olganimizdan xursandman.

Bangladesh terma jamoasi ayniqsa birinchi bo‘limda juda iliq taassurot qoldirdi. Bir necha xavfli qarshi hujumlar tashkil etishdi. Ammo tan olish lozim bangladeshliklar ikkinchi bo‘limda biroz charchab qolishdi. Biz o‘yinga rejalashtirgan strategiyani to‘liq bajardik deb ayta olaman.

Qatar va Tailand termalariga qarshi navbatdagi o‘yinlarga ham reja asosida tayyorgarlik ko‘ramiz. Musobaqa taqvimi ancha zich tuzilgan. Biz ham shundan kelib chiqib tayyorgarlik rejasini ishlab chiqqanmiz. Navbatdagi bahslarda ham g‘alaba qozonib, muxlislarimizni hursand qilish niyatidamiz.

Ikrom Aliboyev: Har doim birinchi o‘yin qiyin bo‘ladi. Hozir hamma futbol o‘ynashshi o‘rganib olgan. Buni bugungi o‘yin ham ko‘rsatib berdi. O‘yin avvalida biroz qiynaldik, ammo keyinchalik nazorat to‘liq biz tomonga o‘tdi. O‘zbekistonlik futbol muxlislarini ushbu g‘alaba bilan tabriklab qolaman.