Andijonda futbolni yanada ommaviylashtirish, yoshlar o‘rtasida sog‘lom turmush tarzini keng targ‘ib qilish, asosiysi - qishloq yoshlari ichidan eng iqtidorli sportchilarni tanlab olish maqsadida mavjud 878ta mahalla jamoalari o‘rtasida nufuzli musobaqa tashkil qilindi.
Musobaqada 18 yoshdan 30 yoshgacha bo‘lgan mahalliy futbolchilardan tuzilgan jamoalar ishtirok etishmoqda. "Viloyat hokimi Kubogi" musobaqasining tuman bosqichidan o‘rin olgan bahslarda Paxtabod tumanidagi 67ta mahalla fuqarolaridan tuzilgan jamoalar 17 kun davomida bellashishdi. Yakunda finalga “Gulobod” va “Muazzimboy” jamoalari yetib kelishdi.
Tuman markazidagi o‘yingohda o‘tkazilgan bahs paxtaobodliklar uchun ommaviy sayl ko‘rinishida tashkil etilganiga alohida to‘xtalib o‘tish lozim.
Ko‘p sonli tomoshabinlar tashrif buyurgan uchrashuv muxlislar kutganidek juda qiziqarli o‘tdi. O‘yinning asosiy vaqti 2:2 hisobida yakunlanib, penaltilar seriyasida “Gulobod” mahallasi futbolchilarining qo‘li balan keldi. Endi ular musobaqaning viloyat bosqichida ishtirok etadi.
Jamoalar birinchi bosqichni o‘z sektorlarida o‘tkazib, ikkinchi bosqich tuman birinchiligiga yo‘l oladi. O‘z tumanida g‘olib bo‘lgan jamoalar viloyat bosqichida to‘p suradi.
Tuman miqyosida g‘olib va sovrindor bo‘lgan mahalla futbolchilari va murabbiylariga tuman hokimi Mahmudjon Bozorov, viloyat futbol assosiasiyasi birinchi vise-prezidenti Bekzodbek Karimov, viloyat jismoniy tarbiya va sport boshqarmasi boshlig‘i O‘tkirbek Toshpo‘latovlar samimiy tilaklarini bildirib, tashkilotchilar nomidan diplom va esdalik sovg‘alari topshirishdi.
“Musobaqa avvalida e’lon qilinganidek, viloyatda birinchi o‘rinni olgan jamoaning mahallasi hududiga zamonaviy mini-stadion qurib beriladi. Sovrindor jamoalarga esa katta summadagi sport jihozlari topshiriladi”, - deydi viloyat futbol assosiasiyasi birinchi vise-prezidenti Bekzodbek Karimov.
