Indoneziyada bo‘lib o‘tayotgan Osiyo o‘yinlarining ikkinchi kuni nihoyasiga yetdi. O‘zbekistonlik sportchilar dastlabki kunga qaraganda, bugun medallarni bittaga ko‘paytirdi.
 
Jumladan, O‘zbekiston sport delegasiyasi tarixida ilk bora ushu sport turidan dastlabki medal qo‘lga kiritildi. Darya Latisheva finalda raqibiga imkoniyatni boy berib, kumush medalga sazovor bo‘ldi.
 
-58 kg vazn toifasida taekvandochi Niyoz Po‘latov final bahsida Janubiy Koreya vakiliga mag‘lubiyatga uchrab, kumush medal bilan taqdirlandi.
 
-67kg vazn toifasida O‘zbekiston sharafini himoya qilayotgan taekvandochi Nigora Tursunqulova ham yarim finalda janubiy koreyalik raqibga yutqazdi va bronza medaliga loyiq ko‘rildi.
 
Kunning so‘nggi medalini erkin kurash sport turi bo‘yicha bellashayotgan Davit Modzmanashvili O‘zbekiston sport delegasiyasi hisobiga qo‘shib qo‘ydi. U bronza medali uchun o‘tkazilgan jangda hindistonlik raqibi ustidan 2:0 hisobida g‘alaba qozonib, sovrindorlar qatoridan joy egalladi.

Shu tariqa, o‘zbekistonlik sportchilar Osiyo o‘yinlarining ikkinchi kunida medallar sonini yettitaga yetkazdi.

Ayni paytda O‘zbekiston delegasiyasi tomonidan 1 ta oltin, 2 ta kumush va 4 ta bronza medali bor. Umumiy hisobda O‘zbekiston 10-o‘rinda boryapti.
 
Ro‘yxatning kuchli uchligini Xitoy (36 medal), Yaponiya (30) va Janubiy Koreya sport delegasiyalari egallagan.