Bugun, 28 avgust kuni Indoneziyada bo‘lib o‘tayotgan Osiyo o‘yinlari musobaqasining o‘ninchi kun hisoblanadi. Bugun o‘zbek sportchilari jami bo‘lib 7 ta medallarni sport delegasiyasi hisobiga qo‘shib qo‘ydilar. 

Jumladan, badiiy gimnastikachi Sabina Toshkenboyeva yakkalik bahslarida 65,850 natija bilan kumush medal sohibasiga aylandi. Yana bir badiiy gimnastikachi Nurinisso Usmonova esa to‘rtinchi o‘rin bilan kifoyalandi. 

Kurash sport turi bo‘yicha esa sportchilarimiz juda ham ijobiy natija qayd etdilar. 

Ya’ni Ma’ruf G‘aybulloyev finalda yana bir o‘zbek polvoni Ruslan Bo‘riyevni mag‘lub etdi va Osiyo o‘yinlarining oltin medalini qo‘lga kiritdi. Ruslan Bo‘riyev kumush medalni terma jamoamiz hisobiga qo‘shib qo‘ydi. 

+90kg vazn toifasida Muhsin Hisomiddinov eronlik Jafar Pahlavonijagharga qarshi jangda g‘alaba qozondi va oltin medalga ega chiqdi. 

Shuningdek, yarim finalda mag‘lub bo‘lgan sportchilarimiz Nurbek To‘rayev va Oysuluv Abdumajidova bronza medaliga sazovor bo‘lishdi. 

Gulnor Sulaymonova final bahsidada hindistonlik Pinski Balharani mag‘lub etib, Osiyo o‘yinlari g‘olibasiga aylandi va oltin medalni qabul qilib oldi. 

Bundan tashqari, bugun ringga ko‘tarilgan uch nafar o‘zbek bokschilari – Jasurbek Latipov, Shunqor Abdurasulov hamda Bobousmon Boturovlar raqiblari ustidan ishonchli g‘alabaga erishib, musobaqa yarim finaliga yo‘llanma olishdi. 

Shu tariqa, O‘zbekiston sport delegasiyasi hisobidagi medallar soni jami bo‘lib 38 taga yetdi. Ularning 9 tasi oltin, 15 tasi kumush va 14 tasi bronza hisoblanadi. O‘zbekiston sport delegasiyasi umumjamoa hisobida kechagi ro‘yxatdan ikki o‘rin yuqoriga ko‘tarilib, 9-o‘rinni egalladi. 

Ro‘yxatning kuchli uchligini hali-hamon Xitoy (206), Yaponiya (142), Janubiy Koreya sport delegasiyalari band etgan.