Bugun, 6 sentyabr kuni O‘zbekiston terma jamoasi Toshkentdagi “Milliy” stadionda Suriya bilan o‘rtoqlik o‘yinini o‘tkazdi.
Ta’kidlash joiz, bu o‘yin argentinalik mutaxassis Ektor Kuperning O‘zbekiston termasiga kelganidan so‘ng murabbiylikdagi debyut o‘yini edi.
Uchrashuv kutilganidek O‘zbekiston MTJ futbolchilarining hujumlari bilan boshlandi, ammo birinchi bo‘limda yaratilgan vaziyatlar golga aylanmadi. Muxlislar terma jamoada murabbiy almashgach ham, hanuz MTJ futbolchilarida o‘zgarish kuzatilmaganini ta’kidladilar.
Chunki birinchi 45 daqiqalikda kamida 2 ta golga tortadigan vaziyat bo‘lgan edi, lekin ba’zida raqib darvozabonining mahorati, ba’zan esa futbolchilarimizning mahoratsizligi sabab birinchi bo‘limda hisob ochilmasdan qoldi.
Bugun O‘zbekiston milliy terma jamoasi darvozaboni Ignatiy Nesterov o‘zining 100-yubiley o‘yinida maydonga tushdi. Unga O‘zbekiston futbol assosiasiyasining maxsus sovg‘asi topshirildi.
Ikkinchi bo‘lim: 62-daqiqada Marat Bikmayev yuzaga kelgan penaltini golga aylantirib, o‘yinda hisobni ochishga erishgan edi, biroq o‘zbekistonlik futbolchilarning xursandchiligi uzoqqa cho‘zilmadi. 78-daqiqada Omar al-Soma Nesterov qo‘riqlayotgan darvozani ishg‘ol qilib, hisobni 1:1 ko‘rinishiga keltirdi. O‘yin durang hisob bilan yakuniga yetdi.
Shu tariqa, “Milliy” stadionga Ektor Kuper qo‘l ostidagi O‘zbekiston terma jamoasining g‘alabasini ko‘rgani kelgan 17800 nafar muxlis chiroyli va kurashga boy o‘yinni tomosha qilish bilan cheklandilar xolos.
O‘zbekiston - Suriya 1:1
Gol: Marat Bikmayev (64 penalti) – Omar al-Soma (78).
O‘zbekiston: 1.Ignatiy Nesterov, 2.Akmal Shorahmedov, 31.Egor Krimes, 5.Anzur Ismoilov, 13.Oleg Zoteev, 8.Javlon Ibrohimov (18.Sardor Sobirxo‘jayev, 46), 16.Otabek Shukurov, 27.Sardor Rashidov (14.Eldor Shomurodov, 76), 10.Marat Bikmayev (11.Temurxo‘ja Abduxoliqov, 68), 6.Husniddin G‘ofurov (26.San’at Shixov, 68), 28.Ivan Nagayev (15.Sardor Mirzayev, 55)
Suriya: 1.Ibrohim Alma, 3.Nodim Sabog‘, 15.Abdul Malik Alanizan, 4.Jihod Al Baour, 5.Omro Al Midani, 8.Mahmud Al Mavas, 9.Omar Al Soma, 11.Osama Omari (7.Aias Osman, 83), 14.Tamir Xoj Muhammad, 10.Muhammad Usmon, 21.Fahad Yusuf
Ogohlantirishlar: Tamir Xoj Muhammad 30.
