O‘zbekiston U-14 terma jamoasi Xitoyning Uxan shahrida tashkil qilinayotgan xalqaro musobaqada ishtirok etayotgani haqida xabar bergan edik.
Birinchi turda Yaponiyaga 0-4 hisobida mag‘lub bo‘lgan futbolchilarimiz ikkinchi turda Tailand ustidan ishonchli g‘alabaga erishgan edilar. Bugun guruh bahslarining so‘nggi turiga start berildi. Ushbu turda Azamat Abduraimov shogirdlari vyetnamlik raqiblariga qarshi to‘p surishdi.
O‘yinning asosiy vaqtida jamoalar darvozalarga 2 tadan to‘p kiritishdi. O‘zbekiston terma jamoasining gollariga Elbek Bo‘riyev mualliflik qildi. Asosiy vaqt durang bilan tugagach penaltilar seriyasiga navbat berildi. Lotoreyada o‘zbekistonlik futbolchilarning qo‘llari baland keldi. Penaltilar seriyasi 5-4 hisobida bizning foydamizga hal bo‘ldi.
Keyingi bosqichga chiquvchi jamoalarning nomi Yaponiya-Tailand uchrashuvi nihoyasiga yetgach ma’lum bo‘ladi.
