O‘zbekiston ilk marotaba ot sportining konkur yo‘nalishi bo‘yicha Jahon kubogi finali «FEI World Jumping Challenge» musobaqasiga mezbonlik qilmoqda. Qoidaga ko‘ra ushbu «Chaqiriq kubogi» Xalqaro ot sporti federasiyasi tomonidan tanlab olingan jahonning turli «sport mintaqalari»dagi eng kuchli chavandozlar ishtirokida bo‘lib o‘tadi. Ushbu musobaqa finalida yil davomida o‘z ligalarida g‘olib va sovrindorlar qatoridan o‘rin olgan sportchilar qatnashadilar. Umumiy qilib aytadigan bo‘lsak, finalda 10 ta mintaqadan eng yaxshi 20 nafar sportchi ishtirok etadi.

Bu yil bahslarda 17 mamlakat vakillari o‘z omadini sinab ko‘rmoqda. Ular ichida o‘zbekistonlik ikki nafar chavandoz ham bor:

Saidamir Turg‘unboyev – 2017 yili Gonkongda o‘tkazilgan Osiyo chempionatining kumush medali sohibi.

Abdushukur Sobirjonov – shu yil oktyabr oyida Argentinada bo‘lib o‘tadigan III yozgi o‘smirlar Olimpiya o‘yinlari lisenziyasini qo‘lga kiritgan sportchimiz.

Bugun musobaqalarning dastlabki kuni bo‘lib o‘tmoqda. Chavandozlar konkurda 115 va 120 sm balandlikdagi bahslarda ishtirok etishmoqda. Ushbu bahslarda «FEI World Jumping Challenge» finalchilari nomi aniq bo‘ladi. Dastlabki saralash konkuridan so‘ng hamyurtimiz, «BABOS» ot sporti klubi a’zosi Saidamir Turg‘unboyev o‘zining «Ambassador» laqabli otida, xech qanday jarima ochkolarisiz yetakchilik qilmoqda.