18 sentyabr kuni O‘zbekiston Kubogi chorak finalida "Paxtakor" "Lokomotiv"ni qabul qiladi.

Chempionlik uchun kurashda ham asosiy raqiblar qatorida borayotgan jamoalar endi kubok yarim finaliga kim yo‘l olishini o‘zaro to‘qnashuvda hal qilib olishadi.

Shu sababli uchrashuvning ahamiyati Superligadagi bellashuv kabi ancha yuqori bo‘lishiga shubha yo‘q. Jamoalar hozirga qadar kubok bahslarida faqat bir bor duch kelishgan. 2014 yil "Lokomotiv" ikki o‘yin natijasiga ko‘ra ustun kelgan - 0:1 va 2:2.

"Paxtakor" O‘zbekiston Kubogini 11 marta qo‘lga kiritgan holda bu borada rekordchi sanaladi. Eng yaqin ta’qibchi "Bunyodkor" bo‘lib, bu jamoa 4 bor kubokda zafar quchgan. "Paxtakor" kubokka 2001-2007 yillarda qatorasiga 7 marta ega chiqqan. "Lokomotiv" esa bu musobaqada 3 bor muvaffaqiyatga erishgan.

"Paxtakor" va "Lokomotiv" o‘rtasida O‘zbekiston Kubogidagi derbi 18 sentyabr, seshanba kuni 20:00da "Paxtakor" stadionida boshlanadi.