Superliga 24-turi doirasidagi “Navbahor” – “Metallurg” (0:0) uchrashuvidan keyingi matbuot anjumanining birinchi qismida mehmonlar ustozi Andrey Shipilov va jamoa darvozaboni Javohir Ilyosov ishtirok etib, o‘yin haqidagi fikrlari bilan o‘rtoqlashishdi.

Andrey Shipilov (“Metallurg” jamoasi bosh murabbiyi): - Raqibimiz o‘z maydonida mag‘lubiyatga uchramaydigan jamoa bo‘lganligini yaxshi bilganimiz uchun mazkur o‘yinga puxta tayyorgarlik ko‘rgandik. Bu esa o‘z mevasini berib, Namanganda qimmatli bir ochkoni qo‘lga kiritdik. Ta’kidlash joizki, bu biz uchun ijobiy natija.

Joriy mavsumning birinchi bosqich bahsida Namanganda yirik hisobda imkoniyatni boy bergandik. O‘sha o‘yindan ham kerakli xulosalar chiqardik. Uchrashuvda ham namanganliklar yaxshi o‘yin namoyish etib, ko‘plab xavfli vaziyatlarni yuzaga keltirishdi.  Masalan, mezbonlar tarkibida Azizbek Turg‘unboyev, Sherzod Karimov va Davron Hoshimov maydonda boshqalardan ajralib turishdi.

Karimov va Hoshimovni sobiq “paxtakorchilar” bo‘lishgani uchun maqtamayapman. Shunchaki, ular yaxshi o‘yin ko‘rsatishdi. Lekin darvozabonimiz va himoyachilar ularga imkoniyat berishmadi. “Navbahor” vakillari esa vaziyatlardan samarali tarzda foydalana olishmadi. “Navbahor” jamoasiga keyingi uchrashuvlarda omad yor bo‘lishini tilayman.

Javohir Ilyosov (“Metallurg” jamoasi darvozaboni): - Maydonda murabbiylarimizning ko‘rsatmalarini amalga oshirishga harakat qildik va Namanganda bir ochko olishga muvaffaq bo‘ldik. Bundan xursandmiz va keyingi uchrashuvlarda ham yaxshi o‘yin namoyish etishga intilamiz.

“Navbahor” PFK matbuot xizmati.