Braziliya OAV vakillari, shuningdek, muxlislar mamlakat milliy jamoasi ustozi Titening sardorlik masalasi bo‘yicha chiqargan qarorini yaxshi qabul qilishmadi.
Eslatma, murabbiy Nyu-Jersi shahrida AQSH termasiga qarshi kechgan o‘rtoqlik uchrashuvi oldidan Neymarni doimiy sardor sifatida tanlaganini ma’lum qildi: «Ha, sardor masalasiga bog‘liq eksperimentlar tugadi. Endilikda bog‘ichning doimiy egasi - Neymar».
«PSJ» vakili o‘sha o‘yinda faol to‘p surdi, gol urdi, jamoani o‘z ortidan ergashtirdi, 2:0 hisobidagi g‘alabaga katta hissa qo‘shdi. Biroq ommaning fikricha, u yetakchilik missiyasini to‘liq bajarishga qodir emas ekan...
NEYMAR NIMA DEDI?
AQSH termasiga qarshi o‘yindan oldingi matbuot anjumanida qatnashgan Neymar murabbiy qaroridan mamnun ekanligini yashirib o‘tirmadi: «Ko‘rasizlar, braziliyalik muxlislar ishonchini qayta qozonaman. Albatta, endi zimmamdagi mas’uliyat ikki hissa ortganini tushunib turibman. Sardorlik bog‘ichi - katta sharaf.
O‘ylaymanki, ancha ulg‘aydim va terma jamoa g‘alabasi yo‘lida jamoadoshlarimga qo‘ldan kelganicha yordam berishga tayyorman. O‘z o‘rnida, jahon chempionatidagi xatti-harakatlarimdan qoniqmagan barcha muxlislar, mutaxassislardan uzr so‘rayman. Yutqazish har doim og‘ir. Maydonga qulash? Himoyachilar bilan «duel»ga hamisha g‘olib sifatida kirishaman.
Ulardan tezkorroq va yengilroqman, shuning uchunmi, ko‘pincha meni qo‘pollik yordamida to‘xtatib qolishga urinishadi. O‘yin vaqtida raqib jarima maydoniga osongina yorib kirishning imkoni yo‘q.
Butun JCH-2018 davomida menga nisbatan tinmay qo‘pollik ishlatishdi. Lekin ishoninglar, atayin qulashni xayolimga ham keltirmadim. Nima bo‘lganda ham, o‘yinimni yanada yaxshilashga harakat qilaman, JCH voqealari o‘ziga xos saboq bo‘ldi».
MUNOSABAT QANDAY?
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
