O‘zbekiston futbol assosiasiyasi tomonidan yurtimizda futbol murabbiyligi sohasini rivojlantirish, ularning kasbiga bo‘lgan qiziqishini orttirish, ularning malakasini muntazam oshirib borish maqsadida bir qator chora-tadbirlar amalga oshirilmoqda.

Jumladan, O‘FA tomonidan Andijon hamda Namangan viloyatlarida murabbiylarning kasbiy malakasini oshirish, murabbiylik sohasidagi yangiliklar bilan muntazam tanishtirib borish maqsadida bilimlarni yangilash o‘quv kurslari tashkil qilingani haqida xabar bergan edik.

Murabbiylar bilimlarini yangilash kurslarining navbatdagisi Toshkent shahrida start oldi. O‘quv kurslari O‘FA instruktori Dmitriy Kim tomonidan olib borilmoqda. Unga instruktor assistenti Yuriy Arslanov hamda koordinator Davletmuratov Oybek yordam berishmoqda.

Yangi tizimga ko‘ra, bilimlarni yangilash o‘quv kurslari 2 moduldan iborat bo‘lib, 1-modul 5 kun davom etadi. 5 kun davomida murabbiylar futboldagi yangiliklardan xabardor qilinadi. So‘ngra murabbiylar bir oy davomida o‘rgangan bilimlarini ish joylarida amalda tadbiq qilishadi. 1 oylik muddat nihoyasiga yetgach, 2-modulga start beriladi va u 4 kun davom etadi. 4 kunlik muddat davomida murabbiylar amaliy hamda nazariy imtixonlar topshirib, ularga yuklatilgan vazifalarni prezentasiya tarzida himoya qilishadi.