Indoneziyaning Jakarta shahrida III Paraosiyo o‘yinlari boshlanganligi haqida xabar bergandik. Bugun musobaqalarga rasman start berildi.

Birinchi kungi bahslarda bir qator sportchilarimiz bahslarga kirishishdi. Quvonarlisi, ularning to‘rt nafari sovrindorlar qatoridan o‘rin oldi.

Medallarning barchasi suzish bahslarida qo‘lga kiritildi. Erkaklar o‘rtasida S13 yo‘nalishida 400 metrga erkin suzish bo‘yicha ishtirok etgan Dmitriy Xorlin barcha raqiblarini ortda qoldirib, oltin medal sohibiga aylandi.

Undan keyin esa marraga Islam Aslanov yetib bordi va kumush medalga ega chiqdi. Huddi shu yo‘nalishning ayollar o‘rtasidagi bellashuvlarida ham oltin va kumush medallar hamyurtlarimizga nasib qildi.

Shohsanamxon Toshpo‘latova marraga birinchi bo‘lib yetib bordi va shohsupaning eng yuqori pog‘onasidan o‘rin egalladi. Undan keyingi natijani qayd etgan Fotimaxon Amilova esa kumush medalga sazovor bo‘ldi.

Musobaqaning birinchi kunidan so‘ng so‘ng 2 ta oltin, 2 ta kumush medal qo‘lga kiritgan O‘zbekiston delegasiyasi Xitoy va Yaponiyadan so‘ng umumjamoa hisobida uchinchi o‘rinni egallab turibdi.