O‘zbekiston futbol assosiasiyasi yurtimizda futbolni ommalashtirish, bolalar futbolini rivojlantirish, terma jamoalarimizga munosib nomzodlarni yetkazib berish maqsadida turli chora-tadbirlarni amalga oshirmoqda.

Yurtimizdagi iste’dodli bolalarni futbol bilan muntazam shug‘ullanishlarini ta’minlash, yosh futbolchilarning saviyasini o‘stirib borish, yangi iste’dodlarni kashf qilish maqsadida, O‘zbekiston futbol assosiasiyasi “Milliy” stadionida bolalar uchun futbol to‘garaklari tashkil etadi.

O‘FA tomonidan ishga jalb qilingan malakali murabbiylar ushbu futbol to‘garaklarida bolalarga futbol sir-asrorlarini o‘rgatib borishadi.

Har bir chiziqda harakat qiluvchi futbolchilar bilan alohida murabbiylar ish olib borishini ham alohida ta’kidlab o‘tish zarur. Masalan, darvozabonlar murabbiyi yosh futbolchilar bilan alohida mashqlar olib borsa, hujumchilar murabbiyi esa yosh futbolchilarda tezkorlik, kuchli zarba yo‘llash, to‘purarlik kabi xususiyatlarni shakllantirib borishadi.

Ushbu to‘garaklarda nazariy va amaliy mashg‘ulotlar o‘tkazish va yosh futbolchilarning mahoratlarini sayqallab borish uchun barcha shart-sharoitlar yaratiladi. Futbol to‘garaklariga turli yoshdagi bolalar qabul qilinib, har bir bola o‘z yosh toifasidagi tengdoshlari bilan mashg‘ulotlarda qatnashadi.

Batafsil ma’lumot uchun quyidagi telefon raqamiga qo‘ng‘iroq qilishingiz mumkin: +998983119955.