Kecha baydarka va kanoeda eshkak eshish bo‘yicha sportchimiz Islomjon Abdusalomov finalgacha yetib borib, kumush medal sohibiga aylandi. Taqdirlash marosimidan so‘ng terma jamoamiz murabbiyi Yekaterina Zarkova ham o‘z fikrlarini bildirib o‘tdi.
“Kurash qiyin kechdi. Saralashdan so‘ng uchinchi o‘rinni egallagandik. Keyin esa Meksika, Chexiya vakillarini mag‘lub etdik. Qozog‘istonlik sportchiga qarshi bahs oldidan Islomjonni har tomonlama tayyorladik. Tiklanish uchun biroz vaqt yetmadi. Bahslar orasidagi tanaffus 20 daqiqadan bo‘ldi. Bu esa juda qisqa vaqt. Qayirilishda u boshqaruvni biroz yo‘qotdi va bu biz uchun qimmatga tushdi. Ammo, terma jamoamiz hisobiga medal qo‘shib qo‘ya olganimizdan juda xursandmiz. Mana shunday saviyadagi musobaqada xarakter ko‘rsatib, oxirigacha kurashgan sportchimiz uchun xursandman”, – dedi Zarkova.
