Norasmiy ma’lumotlarga qaraganda, rossiyalik taniqli mutaxassis Valeriy Gazzayev shu haftadan e’tiboran «Navbahor»da maslahatchi-murabbiy sifatida ish boshlashi mumkin.

Gazzayev 1954 yili Rossiyaning Orjonikidze (hozirgi Vladikavkaz) shahrida tug‘ilgan. Futbolchilik faoliyati davomida «Spartak» (Orjonikidze), SKA (Rostov), «Lokomotiv» (Moskva), «Dinamo» (Moskva) va «Dinamo» (Tbilisi) klublari, shuningdek, sobiq ittifoq olimpiya hamda milliy terma jamoalarida to‘p surgan.

Keyinchalik «Spartak» (Orjonikidze), «Dinamo» (Moskva), «Alaniya», SSKA, «Dinamo» (Kiyev) klublari, Rossiya yoshlar va milliy terma jamoalarini boshqargan. SSKA Gazzayev qo‘l ostida 3 marta Rossiya chempioni bo‘lgan, qolaversa, 2005 yili UYEFA kubogini yutgan.

«Alaniya» ham aynan Valeriy Georgiyevich boshqaruvi ostida, ya’ni 1995 yili Rossiya chempionati g‘olibiga aylangan.

O‘z o‘rnida o‘sha jamoa tarkibida futbolimiz afsonasi Mirjalol Qosimov to‘p surganini ham e’tirof etish joiz. Qisqasi, Valeriy Gazzayev Rossiya chempionati tarixida medallar va kuboklar yutish bo‘yicha eng sermahsul murabbiylardan biridir.