Xabaringiz bor, ertaga 28 oktyabr kuni Farg‘ona shahridagi “Istiqlol” stadionida katta futbol bayrami bo‘lib o‘tadi. O‘zbekiston Kubogi finalida Toshkentning “Paxtakor” va Olmaliqning AGMK jamoalari o‘zaro to‘p surishadi.
Ushbu final uchrashuviga bo‘lgan qiziqish juda katta. Vodiyda futbolni qattiq sevishadi. Futbol uchrashuvlari muxlislar uchun haqiqiy bayramga aylanib ketishi hech kimga sir emas. Aynan vodiydagi futbol muxlislarining qiziqishini inobatga olib, O‘FA 1-vise-prezidenti Umid Ahmadjonov 2018 yilgi Kubok finalini Farg‘onada o‘tkazish bo‘yicha qaror qabul qildi.
Ayni paytda finalga tayyorgarlik avjida. Farg‘onadagi stadion muhim uchrashuv uchun shay holatga keltirilgan.
Final oldidan muxlislar uchun taniqli xonandalar ishtirokida konsert dasturlari o‘tkaziladi. Ular ishtirokidagi kuy-qo‘shiqlar “Istiqlol” stadioniga tashrif buyuradigan muxlislarning kayfiyatini yanada ko‘tarishga xizmat qilishi shubhasiz.
Final o‘yini davomida muxlislarga qulaylik yaratish maqsadida, “Istiqlol” stadionida turli yegulik va ichimliklar savdosi tashkil etiladi. Futbol muxlislari haqiqiy futbol bayramidan bahra olishlari uchun barcha chora-tadbirlar amalga oshirilmoqda.
Ushbu final uchrashuvining barcha xarajatlari PFL hamda PFLning homiy va hamkorlari tomonidan qoplanmoqda.SHu sababli ham final uchrashuvi chiptalari muxlislar uchun bepul qilib belgilandi. Bundan ko‘zlangan asosiy maqsad stadionga ko‘proq muxlislarning tashrif buyurishini, bayramdan barcha birdek bahramand bo‘lishini ta’minlashdan iborat.
Bugun hal qiluvchi uchrashuvda maydonga tushadigan «Paxtakor» va AGMK jamoalari Farg‘onaga yetib kelishdi.
Ularni O‘FA, PFL, Viloyat hokimligi, viloyat futbol assosiasiyasi xodimlari, OAV vakillari va muxlislar tantanli ravishda kutib olishdi. Farg‘onadagi futbol muxlislari ham final o‘yinini intizorlik bilan kutishayotgani hech kimga sir emas. Stadionning muxlislar bilan to‘lib toshishi maydonda harakat qilayotgan futbolchilarga yanada ishtiyoq bag‘ishlashi, ularni yanada ruhlantirishi tabiiy.
Ertaga Farg‘ona shahridagi “Istiqlol” stadioniga tashrif buyuring va shiddatli futbol uchrashuvidan bahramand bo‘ling!
