"Paxtakor" yarim himoyachisi Jaloliddin Masharipov O‘zbekiston Kubogi finali xususida fikrlarini bildirdi.
- Finalga chiqqanimizdan xursandmiz. Mavsum boshida oldimizga ikki jiddiy vazifa qo‘yilgandi - chempionlik va kubokni qo‘lga kiritish. Chempionat hali davom etmoqda va unda oxirigacha kurashamiz. Kubokda esa final o‘yinida maydonga tushamiz. Yetti yillik tanaffusdan so‘ng O‘zbekiston Kubogiga ega chiqishni istaymiz. Yigitlarning kayfiyati yaxshi va biz o‘yinga tayyormiz.
AGMK haqida fikringiz qanday?
- Bu jamoa bilan mavsumda ikkala uchrashuvda qiyinchilikka duch keldik. Ular jiddiy qarshilik ko‘rsatishdi. O‘z maydonimizdagi bellashuvda oxirgi daqiqalarda bizni Suyunov qutqarib qolgandi. Chempionatda quyi oltilikda bo‘lsa-da, AGMK ham final bir uchrashuvdan iborat ekanini yaxshi bilib, yaxshi hozirlik ko‘radi.
O‘tgan yili ham kubokka ega chiqqansiz. O‘zingizni omadli deb bilasizmi?
- Yil boshida "Paxtakor"ga qaytganimda ham sovrinlardan kamida bittasiga ega chiqishni oldimga maqsad qilgandim. O‘tgan yili chempionat va kubokda g‘alaba qozongandim. Nafaqat men, balki butun jamoa ham oldiga yuksak vazifalarni qo‘ygan. Bu yo‘lda mehnat qilishda davom etamiz.
