O‘zbekiston kubogining ushbu mavsumida sensasion natija qayd etildi. O‘z tarixida ilk marta musobaqa finaliga chiqqan AGMK klubi sovrinni qo‘lga kiritdi. Farg‘onadagi "Istiqlol" stadionida bo‘lib o‘tgan final bahsida olmaliqliklar, kutilmaganda, "Paxtakor"ni mag‘lub etishga muvaffaq bo‘lishdi.

Uchrashuvning 16-daqiqasida o‘yin hakami Temur To‘xtasinov toshkentliklar darvozasi tomon penalti belgiladi. Jarima maydonchasi ichida Simich Murzoyevning qo‘lidan tortgandi, Kamoliddin yiqilishni o‘xshatib berdi. AGMK "penalti"chisi Yovan Jokich unchalik kuchli bo‘lmagan zarba bilan hisobni ochdi.

Birinchi bo‘lim so‘ngiga qadar Arveladze shogirdlari vaziyatni o‘nglashga harakat qilishdi, ammo Ashurmatov shogirdlari ishonchli himoyalanishdi.

Ikkinchi taym avvalida "sherlar" penalti ishlashga muvaffaq bo‘lishdi. Bezerra va Bubanya to‘qnashuvidan so‘ng hakam 11 metrli nuqtaga ishora qildi. Ismoil Gonsalvesh kuchli zarba bilan hisobni tenglashtirdi.

O‘yinda yana bir kutilmagan holat qayd etildi. Oradan 3 daqiqa o‘tar-o‘tmas AGMK yana hisobda oldinga chiqib oldi. Oybek Qilichev raqib jarima maydonchasi tashqarisida bir futbolchini aldadi va Jokichga uzatma berdi. Yovan 19 metrdan aniq zarba bilan to‘pni darvoza burchagiga joylab qo‘ydi.

Mazkur gol "Paxtakor" uchun jiddiy zarba bo‘ldi. Toshkentliklar bunga tayyor emasdilar. Ular hisobni tenglashtirish uchun katta kuch bilan oldinga tashlandilar, ammo AGMK futbolchilarining qarshi hujumlari ancha xavfli bo‘ldi. Nihoyat, o‘yinning 90-daqiqasiga kelib Zohir Pirimov hisobni 3:1ga yetkazdi va o‘yinga nuqta qo‘ydi.

AGMK O‘zbekiston kubogini ilk marta qo‘lga kiritdi. Jamoa kelasi mavsumda Osiyo chempionlar ligasining saralash bosqichida ishtirok etadi.

O‘zbekiston kubogi, final
AGMK – “Paxtakor” 3:1 (1:0)
Gollar: Yovan Jokich (18-penalti, 57), Zohir Pirimov (90) — Ismoil Gonsalvesh (54-penalti)
AGMK: Roman Abdulov, Vladimir Bubanya, Vladislav Kasminin, Abduqahhor Xojiakbarov, Azamat Isroilov, Hasur Hasanov, Lutfulla To‘rayev, Zohir Pirimov, Kamoliddin Murzoyev, Yovan Jokich, Oybek Qilichev.
Paxtakor: Eldorbek Suyunov, Akmal Shorahmedov, Sherzod A’zamov, Marko Simich, Farruh Sayfiyev, Dilshod Rahmatullayev, Vladimir Kozak, Ismoil Gonsalvesh, Dragan Cheran, Jaloliddin Masharipov, Tiago Bezerra.