Ўзбекистон кубогининг ушбу мавсумида сенсацион натижа қайд этилди. Ўз тарихида илк марта мусобақа финалига чиққан АГМК клуби совринни қўлга киритди. Фарғонадаги "Истиқлол" стадионида бўлиб ўтган финал баҳсида олмалиқликлар, кутилмаганда, "Пахтакор"ни мағлуб этишга муваффақ бўлишди.

Учрашувнинг 16-дақиқасида ўйин ҳаками Темур Тўхтасинов тошкентликлар дарвозаси томон пенальти белгилади. Жарима майдончаси ичида Симич Мурзоевнинг қўлидан тортганди, Камолиддин йиқилишни ўхшатиб берди. АГМК "пенальти"чиси Йован Жокич унчалик кучли бўлмаган зарба билан ҳисобни очди.

Биринчи бўлим сўнгига қадар Арвеладзе шогирдлари вазиятни ўнглашга ҳаракат қилишди, аммо Ашурматов шогирдлари ишончли ҳимояланишди.

Иккинчи тайм аввалида "шерлар" пенальти ишлашга муваффақ бўлишди. Безерра ва Бубанья тўқнашувидан сўнг ҳакам 11 метрли нуқтага ишора қилди. Исмоил Гонсалвеш кучли зарба билан ҳисобни тенглаштирди.

Ўйинда яна бир кутилмаган ҳолат қайд этилди. Орадан 3 дақиқа ўтар-ўтмас АГМК яна ҳисобда олдинга чиқиб олди. Ойбек Қиличев рақиб жарима майдончаси ташқарисида бир футболчини алдади ва Жокичга узатма берди. Йован 19 метрдан аниқ зарба билан тўпни дарвоза бурчагига жойлаб қўйди.

Мазкур гол "Пахтакор" учун жиддий зарба бўлди. Тошкентликлар бунга тайёр эмасдилар. Улар ҳисобни тенглаштириш учун катта куч билан олдинга ташландилар, аммо АГМК футболчиларининг қарши ҳужумлари анча хавфли бўлди. Ниҳоят, ўйиннинг 90-дақиқасига келиб Зоҳир Пиримов ҳисобни 3:1га етказди ва ўйинга нуқта қўйди.

АГМК Ўзбекистон кубогини илк марта қўлга киритди. Жамоа келаси мавсумда Осиё чемпионлар лигасининг саралаш босқичида иштирок этади.

Ўзбекистон кубоги, финал
АГМК – “Пахтакор” 3:1 (1:0)
Голлар: Йован Жокич (18-пенальти, 57), Зоҳир Пиримов (90) — Исмоил Гонсалвеш (54-пенальти)
АГМК: Роман Абдулов, Владимир Бубанья, Владислав Касминин, Абдуқаҳҳор Хожиакбаров, Азамат Исроилов, Ҳасур Ҳасанов, Лутфулла Тўраев, Зоҳир Пиримов, Камолиддин Мурзоев, Йован Жокич, Ойбек Қиличев.
Пахтакор: Элдорбек Суюнов, Акмал Шораҳмедов, Шерзод Аъзамов, Марко Симич, Фарруҳ Сайфиев, Дилшод Раҳматуллаев, Владимир Козак, Исмоил Гонсалвеш, Драган Черан, Жалолиддин Машарипов, Тиаго Безерра.