"Paxtakor" - "Navbahor" jamoalari o‘rtasidagi uchrashuvidan so‘ng o‘tkazilgan matbuot anjumanida jamoamiz bosh murabbiyi Andrey Kanchelskis va posbonimiz Akbar To‘rayevlar ishtirok etishdi.

- Yaxshi o‘yin bo‘ldi. Albatta natija biz uchun ijobiy ko‘rinish oldi. Kubok finalida yutqazgach, "Paxtakor" futbolchilariga ruhiy tomondan qiyin edi. Nima bo‘lgan taqdirda ham yaxshi tarkibga va ijrochilarga ega bo‘lgan yaxshi jamoaga qarshi o‘ynadik. Futbolchilarimizdan xursandman. Ular bugun borlarini berib katta ishtiyoq bilan ijobiy natija uchun harakat qilishdi. Tarkib borasida ayrim muammolarga duch kelganimiz sababli uchrashuv qaydnomasida zaxiradan atigi uch nafar maydon o‘yinchilari joy olishdi, xolos. Qanday holat bo‘lishidan qat’i nazar, maqsad sari intilmoqdamiz. Oldingi uchrashuvga qaraganda bugun himoyada ancha tartibli o‘yin ko‘rsatdik. Muammolar bor edi. Shunga qaramay, ikkita imkoniyatda gol urishimiz mumkin edi. Oston O‘runov va Sardor Sulaymonov vaziyatlardan foydalana olishmadi. Bir so‘z bilan aytganda, bor kuchlarini berib o‘ynashgani uchun yigitlarga minnatdorchilik bildiraman.

Sherzod Karimov oldingi uchrashuvda jarohat bilan to‘p surgandi. Mirzohid G‘ofurovni esa eski jarohati bezovta qilib qoldi. Darko Nikach esa o‘ziga bo‘lgan talabni pasaytirib yuborganligi sababli yoshlar jamoasi tarkibiga o‘tkazildi. U ayni paytda “Navbahor” jamoasi talabiga javob bermayapti.

Akbar To‘rayev (“Navbahor” jamoasi darvozaboni): - Qiyin o‘yin bo‘ldi. Jangovor durang desak ham bo‘ladi. Yigitlarga rahmat aytaman. Ular himoyada ishonchli harakat qilishdi. Shuning samarasi o‘laroq darvozamiz daxlsizligini ta’minlay oldik. "Paxtakor" jamoasiga keyingi o‘yinlarda omad tilayman.