Turkmaniston poytaxti Ashxobod shahrida og‘ir atletika bo‘yicha jahon chempionati davom etmoqda. Bugun musobaqada -61 kg vazn toifasida erkaklar o‘rtasida «A» guruhi bahslari o‘tkazildi. Ushbu vaznda yurtimiz sharafini Adhamjon Ergashev himoya qildi. Hamyurtimiz musobaqada dast ko‘tarishda 136 kg., siltab ko‘tarishda esa 157 kg. tosh ko‘tardi. Umumiy hisobda 293 kg. natija ko‘rsatgan Adhamjon jahon chempionatida oltinchi o‘rinni egalladi.
Dast ko‘tarishdagi 136 kg. natija orqali 19 yoshli hamyurtimiz yoshlar o‘rtasidagi rekordni yangiladi. Polvonimiz ushbu natijani kattalar o‘rtasidagi musobaqada qayd etgan bo‘lsada, jahon chempionatida bunday toifadagi rekordlar ham alohida inobatga olinadi.
Eslatib o‘tamiz, Ergashev shu yil Toshkent shahrida o‘tkazilgan yoshlar o‘rtasidagi jahon chempionatida dast ko‘tarishda 135 kg., siltab ko‘tarishda 160 kg., umumiy hisobda 295 kg. natija bilan jahon chempioni bo‘lgandi.
Shu o‘rinda muxlislarimizni qiziqtirayotgan yana bir ma’lumotni eslatib o‘tmoqchimiz. Musobaqada g‘oliblik uchun asosiy da’vogar hisoblangan sportchilarimiz Ruslan Nurutdinov (-109 kg.) va Rustam Djangabayev (+109 kg.) mos ravishda 9 va 10 noyabr kunlari supachaga chiqadilar.
