Rossiyaning Xanti-Mansiysk shahrida shaxmat bo‘yicha ayollar o‘rtasida nokaut tizimidagi jahon chempionati bo‘lib o‘tmoqda.

Turnirda 64 nafar shaxmatchi o‘z ishtirokini boshladi. Ushbu jahon chempionatida yurtimiz sharafini xalqaro grossmeyster Gulruhbegim Tohirjonova himoya qilyapti. Hamyurtimiz dastlabki 3ta bosqichda g‘alaba qozonib, chorak finalga chiqishga muvaffaq bo‘ldi.

Gulruhbegim ilk bosqichda rossiyalik Alina Kashlinskayaga qarshi dona surib, 1,5 - 0,5 hisobida g‘alaba qozondi. Ikkinchi bosqichda o‘zbekistonlik grossmeyster xitoylik Tan Jong Yi bilan bahs olib bordi. Asosiy partiyalarda durang qayd etilgan bo‘lsa, tay-brek shaklida o‘yinlarda Gulruhbegimning qo‘li baland keldi — 2.5 - 1.5.

Uchinchi bosqichda Tohirjonovaga yana bir rus shaxmatchisi to‘qnash keldi. Valentina Guninaga qarshi o‘yinning asosiy partiyalarida ham tomonlar bir martadan g‘alabaga erishishdi. O‘zbek shaxmatchisi tay-breykda g‘alabani o‘z tomoniga og‘dirdi — 3 - 1.

Shu tariqa, Gulruhbegim Tohirjonova chorak finalga chiqdi. Unda hamyurtimiz musobaqaning birinchi raqamli shaxmatchisi Chju Ven Jun bilan yarim final yo‘llanmasi uchun dona suradi.

Ma’lumot uchun: Jahon chempionatining sovrin jamg‘armasi 450 000 AQSH dollarini tashkil qiladi va g‘olib shaxmatchi 60 000 dollarga ega bo‘ladi.