Россиянинг Ханти-Мансийск шаҳрида шахмат бўйича аёллар ўртасида нокаут тизимидаги жаҳон чемпионати бўлиб ўтмоқда.

Турнирда 64 нафар шахматчи ўз иштирокини бошлади. Ушбу жаҳон чемпионатида юртимиз шарафини халқаро гроссмейстер Гулруҳбегим Тоҳиржонова ҳимоя қиляпти. Ҳамюртимиз дастлабки 3та босқичда ғалаба қозониб, чорак финалга чиқишга муваффақ бўлди.

Гулруҳбегим илк босқичда россиялик Алина Кашлинскаяга қарши дона суриб, 1,5 - 0,5 ҳисобида ғалаба қозонди. Иккинчи босқичда ўзбекистонлик гроссмейстер хитойлик Тан Жонг Йи билан баҳс олиб борди. Асосий партияларда дуранг қайд этилган бўлса, тай-брек шаклида ўйинларда Гулруҳбегимнинг қўли баланд келди — 2.5 - 1.5.

Учинчи босқичда Тоҳиржоновага яна бир рус шахматчиси тўқнаш келди. Валентина Гунинага қарши ўйиннинг асосий партияларида ҳам томонлар бир мартадан ғалабага эришишди. Ўзбек шахматчиси тай-брейкда ғалабани ўз томонига оғдирди — 3 - 1.

Шу тариқа, Гулруҳбегим Тоҳиржонова чорак финалга чиқди. Унда ҳамюртимиз мусобақанинг биринчи рақамли шахматчиси Чжу Вен Жун билан ярим финал йўлланмаси учун дона суради.

Маълумот учун: Жаҳон чемпионатининг соврин жамғармаси 450 000 АҚШ долларини ташкил қилади ва ғолиб шахматчи 60 000 долларга эга бўлади.