Ispaniyaning yetakchi nashrlaridan biri "Marca" La liganing 2017/18 yilgi mavsumi yakunlari bo‘yicha bir nechta nominasiyalarda eng yaxshilarni e’lon qildi.

"Barselona" hujumchisi Lionel Messi o‘tgan mavsumning eng yaxshi futbolchisi deb topildi. Shu bois, argentinalik futbolchiga Di Stefano nomidagi maxsus sovrin topshirildi. Messi hisobidagi bunday sovrinlar soni 6taga yetdi.

Bundan tashqari, "Barsa" yetakchisi Primeraning eng yaxshi to‘purariga atalgan Pichichi sovrinini ham qabul qilib oldi. Leo o‘tgan mavsumda La liga doirasida 36ta o‘yinda maydonga tushib, 34ta gol urdi. 31 yoshli futbolchi faoliyati davomida beshinchi marta La liga to‘purariga aylandi.

Madridning "Atletiko" klubi posboni Yan Oblak, o‘z navbatida, Ispaniya chempionatining eng yaxshi darvozaboni deb topildi. Sloveniyalik darvozabon faoliyati davomida uchinchi marta Samora sovriniga ega chiqdi. Oblak 2017/18 mavsmda "matraschilar" darvozasini 37ta o‘yinda qo‘riqlab, ularda 22ta to‘p o‘tkazib yubordi.

"Valensiya" ustozi — Marselino Garsiya Toral La liganing eng yaxshi murabbiyi deb topildi. Unga Migel Munyos nomidagi sovrin taqdim etildi. U faoliyatida ilk marta Ispaniya chempionatining eng yaxshi murabbiyi sovrinini qabul qildi.

Darvoqe, sovrinlarni topshirish marosimi Barselona shahrida bo‘lib o‘tdi.