O‘zbekiston futbol assosiasiyasi tomonidan yurtimizda bolalar futbolini rivojlantirish, yosh avlod orasida sog‘lom turmush tarzini targ‘ib qilish va futbolni yanada ommaviylashtirish maqsadida bir qator chora-tadbirlar amalga oshirilmoqda. Jumladan, hududlarda tashkil etilgan bolalar va o‘smirlar futbol akademiyalarida o‘quv jarayonlari sifatini oshirish maqsadida navbatdagi seminar tashkil qilingani haqida avval xabar berib o‘tgandik.
O‘quv-seminari Toshkent viloyati bolalar-o‘smirlar futbol akademiyasida 12-15 noyabr kunlari bo‘lib o‘tdi. Unda OFK instruktori Islom Ahmedov, O‘FA Akademiyalarni rivojlantirish boshqarmasi boshlig‘i Ongar Djalimov, shuningdek, Respublika bolalar va o‘smirlar futbol akademiyasi direktori G. Ayrapetov, V. Vasiliyevich hamda hududiy futbol akademiyalar direktorlari, Sport ishlari bo‘yicha direktor o‘rinbosarlari hamda murabbiylar ishtirok etishdi.
Seminar davomida O‘zbekiston futbol assosiasiyasi tomonidan ishlab chiqilgan dastur asosida o‘quv-mashg‘ulotlarning o‘tkazilishi, kunlik mashg‘ulot konspektlarini yuritilishi hamda murabbiylar tomonidan mashg‘ulotlar tahlilini amalga oshirilishi muhokama qilindi.
Akademiya murabbiylari tomonidan o‘tkazilgan mashg‘ulotlar tasvirga olinib, seminar davomida ishtirokchilar tomonidan tahlil qilindi. Yo‘l qo‘yilgan kamchiliklar ko‘rsatib o‘tildi. Shuningdek, seleksiya tizimini yulga qo‘yish maqsadida akademiyalarda "Bebi-liga musobaqasini joriy etish va doimiy tarzda o‘tkazish muhokama qilindi. O‘FA Akademiyalarni rivojlantirish boshqarmasi boshlig‘i Ongar Djalimov mazkur tizimning ishlash mexanizmi bo‘yicha yig‘ilganlar ko‘rsatmalar berdi va shu mavzuda yuzaga kelgan savollarga javob berib o‘tdi.
Seminarning 3-kuni "Beybi-liga" musobaqasining birinchi turi bo‘lib o‘tdi. Akademiyalar murabbiylari 4 guruhga bo‘lingan holda 2007 yilda tug‘ilgan akademiya tarbiyalanuvchilaridan jamoalar tuzishdi va ular o‘rtasida o‘ziga xos turnir bo‘lib o‘tdi. Turnir yakunida Ongar Djalimov ushbu musobaqani tashkil etishda yuzaga kelgan kamchiliklarni seminar ishtirokchilari ko‘rsatib o‘tdi.
Kelgusida ham hududiy bolalar va o‘sirlar akdemiyalari rahbarlari va mutaxassislari ishtirokida ana shunday seminarlar tashkil qilish bo‘yicha kelishib olindi.
