Xalq ta’limi vazirining huquqiy-nazorat xizmati Jizzax viloyatida o‘qituvchilardan mahalliy futbol klubining moddiy-texnik bazasini mustahkamlash uchun 272,15 mln so‘m mablag‘ yig‘ilganini aniqladi. Vazirlik axborot xizmatining ma’lum qilishicha, hozir ushbu mablag‘larni qaytarish choralari ko‘rilmoqda.

Jizzax viloyati hokimi 2018 yilning 2 noyabrida “So‘g‘diyona" professional futbol klubining moddiy-texnik bazasini mustahkamlash to‘g‘risida” farmoyish chiqargan. Unga asosan 3-4 noyabr kunlari umumxalq hashari tashkil etilgan. Farmoyishda umumxalq hashari doirasida boshqarmalar, idoralar va boshqa tashkilotlarda mehnat qilayotgan ishchi-xodimlarning bir kunlik ish haqi "So‘g‘diyona" futbol klubining hisob raqamiga ixtiyoriy ravishda o‘tkazilishi belgilab qo‘yilgan.

Ushbu hashar doirasida Jizzax viloyati xalq ta’limi boshqarmasi tasarrufidagi 10 ta tuman xalq ta’limi bo‘limiga qarashli umumiy o‘rta ta’lim maktablari ishchi-xodimlarining jami 272 156 729 so‘mlik ish haqi o‘tkazib berilgan. 

Hokimning bu farmoyishi Vazirlar Mahkamasining 2018 yil 10 maydagi “O‘zbekiston Respublikasida majburiy mehnatga barham berishga doir qo‘shimcha chora-tadbirlar to‘g‘risida”gi qaroriga zid ravishda qabul qilingan. Umumxalq hashari faqat prezidentning hujjati yoki hukumat qarori bilangina tashkil etilishi mumkin.

Xalq ta’limi vazirining huquqiy-nazorat xizmati aralashuvidan so‘ng viloyat hokimining “So‘g‘diyona" professional futbol klubining moddiy-texnik bazasini mustahkamlash to‘g‘risida”gi farmoyishi bekor qilindi. Hozir "So‘g‘diyona" futbol klubi hisob raqamiga noqonuniy o‘tkazilgan pullarni qaytarish choralari ko‘rilmoqda.