Xabaringiz bor, shu kunlarda Milliy olimpiya qo‘mitasida yurtimizdagi sport federasiya va assosiasiyalar vakillari bilan uchrashuv tashkil qilinmoqda. Unda federasiya mas’ullari Tokio 2020 Olimpiadasi uchun o‘zlarining strategik rejalarini taqdim etmoqdalar.

Ana shunday uchrashuvlarning navbatdagisi bugun O‘zbekiston og‘ir atletika federasiyasi, O‘zbekiston dzyudo federasiyasi hamda O‘zbekiston gimnastika federasiyasi vakillari bilan o‘tkazildi. Yig‘ilishlarda Jasur Matchanov boshchiligidagi ishchi guruh a’zolari ham ishtirok etishdi.

O‘zbekiston og‘ir atletika federasiyasi bilan tashkil qilingan yig‘ilishda federasiya raisi o‘rinbosari Shahrillo Mahmudov og‘ir atletikachilarimizning Yaponiyada o‘tkaziladigan Olimpiya o‘yinlari uchun tayyorgarlik rejasi, maqsadlarini tushuntirib berdi. Shuningdek, qaysi musobaqa orqali qanday reyting ochkolariga ega bo‘lish mumkinligi haqida ma’lumot bilan tanishtirdi.

Shuningdek, O‘zbekiston dzyudo federasiyasi mutasaddilari, murabbiylar ham Milliy olimpiya qo‘mitasi vakillariga o‘zlarining Tokio 2020 Olimpiadasi uchun tuzgan rejalari haqida ma’lumot berdilar. Federasiya bosh kotibi Abdullo Murodov hamda terma jamoa bosh murabbiyi Farhod To‘rayev sportchilarimizning bugungi kundagi holati, ular bilan kuzatilayotgan muammolar va kamchiliklar haqida gapirishdi. Yig‘ilish davomida sportchilarimizning umumiy jismoniy tayyorgarligini ham kuchaytirish lozimligiga alohida e’tibor qaratildi.

Gimnastika federasiyasi mas’ullari bilan o‘tkazilgan yig‘ilish ham aynan shu mavzuda tashkil etildi. Sportchilarimizning Olimpiya o‘yinlari lisenziyasini qo‘lga kiritish imkoniyatlari, shuningdek Tokioda sovrinli o‘rinlarga ega chiqish masalalari keng muhokama qilindi.