Avvalroq, Milliy olimpiya qo‘mitasida futbol bo‘yicha O‘zbekiston olimpiya terma jamoasi murabbiyi Ravshan Haydarov ishtirokida matbuot anjumani tashkil qilingani haqida xabar bergan edik.
Haydarovga yordamchi murabbiy Shuhrat Asatov, terma jamoa futbolchilari Husniddin G‘ofurov va Aziz Omonov hamrohlik qildi.
Anjumanda «Dubai Cup» musobaqasi yakunlari, O‘zbekiston Olimpiya terma jamoasining Tokio 2020 Olimpiadasiga atab ishlab chiqilgan strategiyasi, rejalar va yig‘inlar haqida ma’lumot berildi.
Husniddin G‘ofurov: “Olimpiya terma jamoasining asosiy tarkibiga kirish uchun raqobat juda katta. Ana shu raqobatga dosh berish uchun ham futbolchilar muntazam o‘z ustilarida ishlab borishlari kerak.
Biz o‘z oldimizga katta maqsad qo‘yganmiz. Ana shu maqsad yo‘lida birgalikda harakat qilyapmiz.
Umid qilamanki, o‘z maqsadimizga yetib, Olimpiada yo‘llanmasini qo‘lga kiritamiz”.
