26 noyabr kuni Toshkent shahrida o‘zbekistonlik aralash qoidali janglar ustasi Murod Xonto‘rayev Toshkent savdo majmuasida joylashgan ofisida pichoqlab ketildi.
Sportchi pichoqdan 9 marta jarohatlangan. Unga shifokorlar bosh miya yopiq jarohati, bosh miya chayqalishi, bosh o‘ng tepa sohasi ezilib yorilgan jarohati, o‘ng son, dumba sohasi, ko‘plab sanchilib kesilgan jarohatlari (9 ta) ikkala ko‘krak usti sohasi sidirilgan jarohati, chap tirsak sohasi kesilgan jarohati tashxisini qo‘ygandi.
Bugun kechga yaqin Murod Xonto‘rayevning ofisida yuz bergan bezorilikning videolari tarqaldi.
Videoning birinchisi Toshkent savdo markazi tashqarisiga o‘rnatilgan videokuzatuv moslamasidan olingan. Unda avtoturargohga oq rangdagi Cobalt va qora Lacetti avtomobiligi kelib to‘xtagan. Ulardan qora rangli maxsus kiyimlari, boshiga niqob taqqan o‘nga yaqin barzangi tushib, quvalashib bino ichkarisiga kirgan.
VIDEONI KO‘RISHDA MUAMMOGA DUCH KELDINGIZMI? UNDA BU YERGA BOSING.
Ichkaridagi kuzatuv kameralari qayd etgan tasvirlarda esa Murod Xonto‘rayev ham ko‘rinish bergan. Sportchi niqobli noma’lum shaxslardan qochayotgani tasvirlangan.
VIDEONI KO‘RISHDA MUAMMOGA DUCH KELDINGIZMI? UNDA BU YERGA BOSING.
Tergovda aniqlangan ma’lumotlarga qaraganda, noma’lum shaxslar Murod Xonto‘rayev va uning tanishi I.S.ga “erga yot” buyrug‘ini bergach, Xonto‘rayev va uning tanishlari niqoblangan kishilarni davlat idorasi xodimlari deb o‘ylab, yerga yotishgan.
Noma’lum shaxslar o‘zlari bilan olib kelgan o‘tkir tig‘li jismlar – temir (armatura) bo‘laklari, rezina tayoqlar (dubinka), pnevmatik o‘qotar qurollardan foydalanib, Murod Xonto‘rayev va uning tanishi I.S.ni urib, tan jarohati yetkazib, voqeadan joyidan g‘oyib bo‘lishgan.
Ayni damda Toshkent shahar Ichki ishlar bosh boshqarmasi tomonidan mazkur holat bo‘yicha O‘zbekiston Respublikasi Jinoyat kodeksining 277-moddasi, 2-qismi bilan jinoyat ishi qo‘zg‘atilgan.
Ma’lumot o‘rnida, sportchi Murod Xonto‘rayev 1987 yilda tug‘ilgan. U muqaddam 2011 yilda Mirzo Ulug‘bek tumani JIB sudi tomonidan O‘zbekiston Respublikasi Jinoyat kodeksining 177-moddasi 3-qismi “b” bandi va 104-moddasi, 3-qismi “g” bandi bilan sudlangan.