23 noyabr – 1 dekabr kunlari poytaxtimizda bo‘lib o‘tgan «CAFA Women’s Championship 2018» musobaqasi o‘z yakuniga etdi.

“Milliy” stadionida bugun so‘nggi tur o‘yinlari bo‘lib o‘tdi. Dastlab Afg‘oniston terma jamoasi Tojikistonga qarshi bahs olib borib, 5ta to‘p farqi bilan imkoniyatni boy bergan bo‘lsa, so‘ngra kunning ikkinchi o‘yinida Eron terma jamoasi Qirg‘izistonni 5:0 hisobida mag‘lub etdi.

O‘yinlardan so‘ng stadionda g‘olib va sovrindorlarni taqdirlash marosimi bo‘lib o‘tdi. Unda Markaziy Osiyo Futbol Assosiasiyasi prezidenti Umid Ahmadjonov ishtirok etib, musobaqa davomida o‘zini ko‘rsata olgan futbolchi va turnir g‘oliblarini taqdirladi.

Unga ko‘ra, Tojikiston terma jamoasi «CAFA Women’s Championship 2018» musobaqasi bronza medallariga sazovor bo‘ldi. Eron terma jamoasi qizlari esa kumush medallarga ega chiqishdi. Musobaqa bosh sovrini esa O‘zbekiston milliy terma jamoasiga nasib etdi.

Shuningdek, MOFA maxsus sovrini Afg‘oniston terma jamoasiga berildi. Muxlislar sovrini Qirg‘iziston terma jamoasi qizlariga nasib etdi. Fair Play mukofoti Tojikiston terma jamoasiga taqdim etildi. O‘zbekiston terma jamoasi a’zosi Nilufar Qudratova musobaqa to‘purari bo‘ldi. Terma jamoamiz yetakchilaridan biri Lyudmila Karachik esa musobaqaning eng yaxshi futbolchisi, deb topildi.