Turkiyaning Konya shahrida 16 yoshgacha bo‘lgan bo‘lgan aql-idrok sohiblari o‘rtasida Butunjahon shaxmat Olimpiadasi yakunlandi. Bugun hamyurtlarimiz so‘nggi, to‘qqizinchi tur doirasida Xitoy terma jamoasiga qarshi bahs olib borishdi va 2,5 : 1,5 hisobida g‘alaba qozonishdi.
Shu tariqa vakillarimiz 9 tur yakuniga ko‘ra faxrli oltin medalga ega chiqdilar. Shaxmatchilarimiz musobaqa davomida Rossiya, Xitoy, Hindiston, Eron, Ukraina, Vengriya, Polsha, Moldova kabi terma jamoalarni mag‘lubi etishdi. Bitta turda amerikalik raqiblarga imkoniyat boy berildi. Shaxmat Olimpiadasida yurtimiz sharafini Nodirbek Yoqubboyev, Nodirbek Abdusattorov, Javohir Sindorov, Shamsiddin Vohidov va Sitora Saparova himoya qildi.
Qayd etish lozimki, O‘zbekiston terma jamoasi avval bunday natija ko‘rsatmagan. Butunjahon shaxmat olimpiadasining mazkur oltin medali o‘zbek shaxmati tarixida dastlabkisidir.
Milliy olimpiya qo‘mitasi ushbu muvaffaqiyat bilan yosh shaxmatchilarimiz, ularning murabbiylari va O‘zbekiston shaxmat federasiyasini muborakbod etadi.
