Xabaringiz bor, O‘zbekiston Professional futbol ligasi mavsum boshidan buyon har oy eng yaxshilarni aniqlab keldi.
Tashkil etilgan so‘rovnomada PEPSI Superliganing 12 ta klubi bosh murabbiylari va sardorlari ishtirok etib kelishdi. Shuningdek, muxlislar ovozi PFL rasmiy saytida bo‘ladigan so‘rovnoma orqali qabul qilindi.
Mana Superliganing 2018 yilgi mavsumi ham yakuniga etdi. Ortda qolgan noyabr oyida Superligada 28-29-30-31-32-tur uchrashuvlari o‘tkazildi. Mazkur uchrashuvlarda bir qator darvozabonlar ishonchli o‘yin namoyish etib, muxlis-u mutaxassislar olqishiga sazovor bo‘ldi. Qolaversa, jamoasining muhim ochkolar qo‘lga kiritishida xissa qo‘shishdi.
Noyabr oyining eng yaxshi darvozabonini aniqlash uchun o‘tkazilgan so‘rovnoma yakunlariga ko‘ra, “Lokomotiv” jamoasi posboni – Ignatiy Nesterov eng ko‘p ochko to‘pladi. Milliy terma jamoamiz darvozaboni o‘tgan oyda 4ta o‘yinda “temiryo‘lchilar” darvozasini qo‘riqlab, ulardan 2tasini quruq o‘tkazdi, ya’ni o‘z darvozasi daxlsizligini saqlab qola oldi. Shu tariqa, Superliga jamoalari murabbiylari, sardorlari va futbol muxlislari o‘rtasida tashkil etilgan so‘rovnoma natijalari aynan Nesterovni noyabr oyining eng yaxshi darvozaboni deya e’tirof etdi.
