Xabaringiz bor, kelasi yilning 5 yanvar - 1 fevral kunlari Birlashgan Arab Amirliklarida Osiyo Kubogi musobaqasi bo‘lib o‘tadi.

O‘zbekiston milliy terma jamoasi mazkur musobaqaning "F" guruhida Yaponiya, Ummon va Turkmaniston terma jamoalariga qarshi bahs olib boradi. 9 yanvar kuni Osiyo Kubogidagi ilk o‘yinimiz Ummon terma jamoasiga qarshi Sharja shahridagi "Sharjah stadium" o‘yingohida bo‘lib o‘tadi.

Musobaqadagi mazkur raqibimiz Ummon terma jamoasi kecha 13 dekabr kuni Maskat shahrida yon qo‘shnilarimiz Tojikiston terma jamoasiga qarshi bahs olib bordi. Uchrashuv maydon egalarining 2:1 hisobidagi g‘alabasi bilan yakuniga yetdi.

O‘yindan so‘ng Tojikiston terma jamoasini boshqarayotgan taniqlik o‘zbekistonlik mutaxassis Usmon Toshev quyidagi fikrlarni bildirib o‘tdi: "Futbolchilarimiz bugun yaxshi harakat qilishdi. Ammo ikkita qo‘pol xato mag‘lubiyatga uchrashimizga sababchi bo‘ldi. Natija salbiy bo‘lishiga qaramay, yigitlar ko‘rsatmalarimni to‘liq bajarishga harakat qilishayotgani menga yoqdi. Tojikiston terma jamoasining salohiyati bor. O‘yindan o‘yinga kuchayib borishimizga ishonchim komil".

Endi 16 dekabr kuni Ummon terma jamoasi Tojikistonga qarshi yana bitta o‘rtoqlik o‘yini o‘tkazadi.

O‘rtoqlik o‘yini
Ummon – Tojikiston – 2:1
Gollar: Muhammad Al-Hasaniy, 74 (1:0). Mo‘’taz Solih, 76 (2:0) - Sharafjon Solihov, 89 (2:1).
Ummon: Ahmad Faraj Al Ravahiy, Muhammad Faraj, Muhsin Gavhar, Ahmad Muborak, Xolid Al Barikiy, Komil Al Ahmadiy, Muhsin Al Hasaniy, Ali Salim, Mo‘’taz Solih, Harib Al Sa’diy, Ahmad Al Kabiy.
Tojikiston: Shoxruh Qirg‘izboyev, Siyovush Asrorov, Xurshed Beknazarov, Zoir Jo‘raboyev, Baxtiyor Qalandarov (Huseyn Nurmatov, 80), Amirbek Jo‘raboyev (Karomatullo Saidov, 84), Axtam Nazarov, Muhammadjon Rahimov (Shervoni Mabatshoyev, 77), Komron Tursunov, Ehsoni Panjshanbe (Sharafjon Solihov, 87), Jahongir Ergashev (Sheriddin Boboyev, 69).
Ogohlantirishlar: Xurshed Beknazarov (Tojikiston).
Bosh hakam: Muhammad Hasan Mahmud Arafa (Iordaniya).