Jismoniy tarbiya va sport vazirining vazirlik tizimidagi sport-ta’lim muassasalarida ish yuritish bo‘yicha me’yoriy hujjatlarni tartibga solish to‘g‘risida buyrug‘i qabul qilingani haqida xabar bergan edik.
Joriy yilning 13-14 dekabr kunlari Xorazm viloyati Urganch shahrida ushbu buyruqda belgilangan vazifalar ijrosi ta’minlashga qaratilgan “Vazirlik tizimidagi sport-ta’lim muassasalari faoliyatiga oid hujjatlarni hamda sport hakami faoliyatini tartibga solish” mavzusida hududiy o‘quv seminar o‘tkazildi.
Seminarda Jismoniy tarbiya va sport vazirligi rahbariyati, tegishli boshqarma va bo‘lim boshliqlari, Qoraqalpog‘iston Respublikasi, Buxoro, Navoiy, Samarqand, Qashqadaryo va Surxondaryo viloyatlarida faoliyat olib borayotgan 139 nafar bolalar-o‘smirlar sport maktablari va ixtisoslashtirilgan bolalar-o‘smirlar sport maktablari direktorlari, sport federasiya (assosiasiya)lari mutasaddilari ishtirok etishdi
Urganch davlat universiteti madaniyat saroyida tashkil etilgan seminarning birinchi kunida jismoniy tarbiya va sport vaziri o‘rinbosari SH.Mo‘minjonov O‘zbekiston Respublikasi Prezidentining 2017 yil 5 martdagi “Jismoniy tarbiya va ommaviy sportni yanada rivojlantirish chora-tadbirlari to‘g‘risida”gi qarori ijrosi yuzasidan amalga oshirilayotgan ishlar va istiqboldagi vazifalar xususida batafsil ma’lumot berdi. Tadbirda, shuningdek, ta’lim muassasalarida yuritilishi lozim bo‘lgan hujjatlar nomenklaturasi, davlat ta’lim standartlari, darsliklar, o‘quv qo‘llanma va o‘quv-metodik adabiyotlarni yaratish hamda ommaviy sport tadbirlarini o‘tkazish mavzularida ma’ruzalar tinglandi.
Shundan so‘ng seminar ishtirokchilari Urganch ixtisoslashtirilgan olimpiya zaxiralari maktab internati hamda “Yoshlik” sport majmuasidagi ixtisoslashtirilgan bolalar-o‘smirlar sport maktablari faoliyati bilan tanishdilar.
Tadbirning ikkinchi kunida ishtirokchilarga ta’lim muassasalarini obodonlashtirish, na’munaviy yo‘riqnoma asosida bezash va jihozlash, moliya-xo‘jalik faoliyatini yuritish, yuridik xizmat, sport hakamligi faoliyatiga doir malaka talabalari, ish yuritish bo‘yicha me’yoriy hujjatlarni tartibga solish to‘g‘risida batafsil ma’lumot berildi.
Shu kuni seminar ishtirokchilari Xiva shahar “Do‘stlik” mahallasida O‘zbekiston Respublikasi Prezidentining 2018 yil 20 oktyabr “Davlat-xususiy sheriklikni rivojlantirishning huquqiy va institusional bazasini yaratish bo‘yicha birinchi navbatdagi chora-tadbirlar to‘g‘risida”gi qarori asosida qurilgan “Grand Abdumalik” sport majmuasining tantanali ochilish marosimi ishtirok etishdi.
Sport majmuasining ochilish marosimida jismoniy tarbiya va sport vazirining o‘rinbosari SH.Mo‘minjonov, Xiva shahri hokimi, viloyat jismoniy tarbiya va sport boshqarmasi boshlig‘i SH.Madaminovlar so‘zga chiqib, respublikamizning turli hududlardan tashrif buyurgan sport-ta’limi muassasalari direktorlariga davlat-xususiy sherikligi asosida sport majmualarini tashkil etishning shartlari va afzalliklari haqida ma’lumot berishdi.
Yakunda ishtirokchilarga ushbu seminar davomida olgan bilim va ko‘nikmalarini o‘z muassasalarida amaliyotga joriy etish vazifasi yuklandi.
