Avval xabar berilganidek, O‘zbekiston futbol assosiasiyasi yurtimizda hakamlikni rivojlantirish, hakamlar malakasini oshirish, ularning kasbga bo‘lgan layoqatlarini sinovdan o‘tkazish maqsadida, muntazam ravishda hakamalarni attestasiyadan o‘tkazib kelmoqda.
Shunga ko‘ra, shu yilning 25 dekabr kuni Toshkent shahrida Respublikamizning barcha hududlaridan saralab olingan 40 nafardan ortiq yosh hakamlarni attestasiyadan o‘tkazish jarayoni bo‘lib o‘tadi.
Attestasiyada hakamlar jismoniy tayyorgarlik hamda futbol o‘yini qoidalari bo‘yicha sinovdan o‘tadilar. Jismoniy testlar Toshkent shahridagi Yengil Atletika federasiyasi yugurish yo‘lakchasida o‘tkazilsa, nazariy imtihonlar "Chig‘atoy" sport majmuasida bo‘lib o‘tadi. Imtihonlar O‘FA Hakamlar va nazoratchilar boshqarmasi tomonidan o‘tkaziladi.
Sinovlardan muvaffaqiyatli o‘tgan yosh hakamlar kelasi yilning yanvar oyida Pro-liga hakamlar uchun bo‘lib o‘tadigan o‘quv-mashg‘ulot yig‘iniga taklif etiladi.
