Oldinda bizni biri – biridan qiziqarli uchrashuvlar kutib turibdi. Bugun Osiyo kubogining 1- turidagi eng qiziqarli uchrashuvlarga to‘xtalamiz:

5 – yanvar BAA – Baxrayn

Turnirni doimgidek mezbonlar ochib berishadi. Ochilish uchrashuvlari ko‘pincha shiddatli va tomoshabop bo‘lishini hisobga olsak, bugun biz juda ham ajoyib uchrashuvning guvohi bo‘lamiz.

7 – yanvar Xitoy – Qirg‘iziston

Osiyo kubogidagi debyutini o‘tkazadigan qo‘shnilarimiz turnirdagi eng kam o‘rganilgan jamoa sifatida qiziqishga sabab bo‘lmoqda. O‘rtoqlik uchrashuvlarida qo‘shnilarimiz uyushqoq va kombinasion futbol namoyish qilgan holda bir nechta g‘alabalarga erishishdi. Qirg‘iziston termasining o‘yinlarini biz ham katta qiziqish bilan kuzatamiz. Nima bo‘lgan taqdirda ham, «Ko‘zdek qo‘shnilarmiz», axir! Bundan tashqari, futbol uchun aql bovar qilmas pullarni sarflayotgan Xitoy termasining o‘yinlarini ko‘rish ham hamma uchun kutilayotgan bo‘lsa, ajab emas!

6 – yanvar Avstraliya – Iordaniya

Biz bu uchrashuvni 1- turdagi markaziy o‘yin desak, adashmagan bo‘lamiz. Hoshimiylar bizdan farqli o‘laroq o‘z vaqtida Avstraliyani yengishni uddasidan chiqa olishgan. Buni yana takrorlash hech gap emas. Sababi futbol olamida amaldagi chempionlarning o‘z guruhida qolib ketganini bir necha bor ko‘rganmiz. Avstraliya futbolchilarining bu turnirda qanday qatnashishlari ularni qanday motivasiya bilan kelganliklariga bog‘liq!

9 – yanvar O‘zbekiston – Ummon

Mana hammamiz kutayotgan uchrashuv. Bu o‘yinning katta ahamiyat kasb etadigan yana bir tomoni shundaki, yangi murabbiy qo‘l ostidagi yangi O‘zbekiston, yangi uslubda rasmiy uchrashuvda debyut qiladi! Kuper janoblarining O‘zbekiston termasi va nihoyat natijaga o‘ynaydi! Shu kungacha deyarli hamma o‘rtoqlik uchrashuvlari natijaga emas, sinovmaqsadida qurbon qilingandi. Mana endi termamizni haqiqiy kuchini ko‘rib olamiz! Olg‘a O‘zbekiston!