«Inter»ning va Argentina termasining afsonaviy sardori, mehnatkash yigit, va shunchaki yaxshi inson sifatida ardoqlanadigan Zanetti «ko‘k-qoralar» tarkibida 600 dan oshiq uchrashuvlar o‘tkazgan, shuningdek, klublar doirasida qanday sovrin bo‘lsa, hammasini qo‘lga kiritgan, lekin muxlislarning unga bo‘lgan hurmatining sababi bu emas…

Zanetti hech qachon mashg‘ulotlarga kech qolmas, qimmatbaho mashinalar va modellar bilan o‘ralashib yurmas, namunali inson sifatida jamoada o‘z hurmatiga ega futbolchi edi. U «Inter» tarkibida 15 dan ortiq kubok egasi bo‘lib emas, muxlislar yoqimtoyi sifatida futbol tarixida qoldi.

Italiya «A Seriyasi» doirasidagi uchrashuvlardan biri. Stadion o‘rindiqlaridan birida o‘tirgan «Inter» muxlisi maydonga yugirib tushadi. Havfsizlik hodimlari uni qurshab olishadi, kuch ishlatib maydondan olib chiqib keta boshlashadi. Shu payt qahramonimiz yugurib, o‘z klubi muxlisining qo‘lini qo‘yib yuborishlarini talab qiladi va uni quchoqlagancha maydon chetigacha kuzatib qo‘yadi. Muxlislar olqishlar bilan uning nomini hayqirib ayta boshlashadi. U esa hech narsa bo‘lmagandek yana o‘yinga qo‘shilib ketadi.

Yana bir qiziq voqea.

2010-yildagi CHL finalida «Inter», «Bavariya»ga hech qanday imkon qoldirmaydi va deyarli yarim asr kutilgankubokni qo‘lga kiritadi. Hakamning final hushtagi chalinganda, «Inter» klubi o‘yinchilari va murabbiylari quvonchdan o‘zlarini qo‘yarga joy topa olmay qolishadi. Zanetti esa maydon chetiga o‘tirib olgancha, ko‘z yoshlarini tiya olmasdi…

Mana shu darajada o‘z jamoasi uchun qayg‘uradigan va g‘alabasi uchun jonini ayamaydigan «kapitan»i bor edi «Inter»ning

Zanetti 1994-yildan 2014 yilga qadar sevimli jamoasining sardori sifatida «Inter» sharafini munosib himoya qildi. O‘zining xayrlashuv uchrashuvida barchani yig‘latgancha, indamay maydonni tark etdi. Deyarli butun umrini «ko‘k-qoralar» bilan bog‘lagan futbolchi millionlab muxlislarning yuraklarida «Inter» klubining sardori sifatida mangu qolajak!