Bugungi “Nasaf” – “Qizilqum” nazorat uchrashuvi yakuniga yetgach, “Nasaf” ustozi Ro‘ziqul Berdiyev bilan tayyorgarlik jarayoni, oldindagi rejalar, tarkibni kuchaytirish bo‘yicha olib borilayotgan ishlar to‘g‘risida suhbatlashdi.
“Yangi mavsum tayyorgarligini 3 yanvar kuni boshlagan edik, mana bugun ikki haftalik o‘quv-yig‘in mashg‘ulotlarimizni dastlabki qismini, nazorat uchrashuvi bilan yakunladik. Dastlabki bosqichdagi asosiy e’tibor jismoniy tayyorgarlikka qaratildi.
Yangi chempionatga tayyorgarlikning navbatdagi ikkinchi bosqichini 20 yanvar kunidan yana Qarshida davom ettiramiz, bu bosqich 2 fevral kunigacha davom etadi. Bu bosqichda ham nazorat uchrashuvlari o‘tkazishni rejalashtirganmiz. Klubimiz rahbariyati imkon yaratib bersa, uchinchi bosqich tayyorgarligini Turkiyada davom ettirmoqchimiz. Chunki, bizda fevraldagi ob-havo, to‘liq mashg‘ulot o‘tkazishga noqulayroq hisoblanadi.
Ayni paytda biz bilan birga boshqa jamoalarda to‘p tepgan ko‘plab yosh futbolchilar mashg‘ulotlarimizda ishtirok etishayapti, bularni biz ko‘rikdan o‘tkazayapmiz. Imkoniyatlarini chamalab ko‘rayapmiz. Bizni qoniqtirganlarni, safimizda olib qolamiz.
Bizning aksariyat asosiy tarkib o‘yinchilarimiz terma jamoalarga jalb etilgan. Tayyorgarligimiz ularsiz davom etayapti. To‘g‘ri, ular ham terma jamoalarimiz mashg‘ulotlarida ishtirok etishayapti. Tarkibimizga qo‘shiladigan yangilarni tezroq jalb etib, asosiy e’tiborimizni jamoaviy o‘yinimizni shakllantirishga qaratishimiz kerak. O‘zingizga ma’lum, futbolchilar bir-birlarini tushunib olib, jamoaviy o‘yinga moslashishi, ma’lum vaqtni talab qiladi. Qolaversa, yangi chempionatning boshlanishi ham tobora yaqinlashib kelayapti.
Endi tarkibdagi o‘zgarishlar haqida to‘xtalsam. Hozircha, jamoamizni rasman Maqsud Karimov va Saydullo Rahmatovlar tark etishdi. Sanjar Quvvatovni “Paxtakor” bilan o‘zaro kelishuvga erishganligi haqida gaplar tarqaldi. Ammo buni to‘g‘ri yoki noto‘g‘riligini tasdiqlay olmayman. Chunki, futbolchimiz anchadan buyon milliy terma jamoamiz bilan birga bo‘lganligi sabab, o‘zaro gaplashganimiz yo‘q.
Jamoamizning avvalgi yillardagi mavqiyeni tiklashimiz uchun, imkoniyat darajasida tarkibimizni kuchaytirishimiz talab etiladi. To‘g‘ri, o‘tgan chempionatning ikkinchi yarmidan boshlab, biz ko‘plab yosh o‘yinchilarimiz xizmatidan foydalanishga majbur bo‘ldik. Bu esa ularni katta futbolda tajriba to‘plashiga sabab bo‘ldi. Endi biz bu futbolchilarimizni jamoamizda saqlab qolishimiz kerak.
Biz ko‘plab tajribali o‘yinchilarni yo‘qotdik. Agar biz yana yetakchi o‘yinchilarimizni boshqalarga berib yuboraversak, ularni o‘rnini qanday to‘ldiramiz? “Nasaf”dek klubni siyosati yoki nufuzi nima bo‘ladi?
Jamoamizga legioner futbolchilar ham kerak. Ammo bizni o‘rtamiyona legioner futbolchilar umuman qoniqtirmaydi. Bu darajadagi legioner futbolchini olib, o‘zimizni intiluvchan yoshlarimizni yo‘lini to‘sib qo‘yish ham to‘g‘ri emas. Gevorkyan, Cheran yoki Golbandek legionerlar bo‘lsagina, jamoamiz o‘yinlarini yanada kuchaytira olishi mumkin” deydi Ro‘ziqul Berdiyev.
