Xabaringiz bor, 2018 yilda sambo ilk marotaba Osiyo o‘yinlari dasturidan o‘rin oldi. Unda qit’amiz sambochilari to‘rtta vazn toifasida medallar uchun kurash olib bordilar. Bahslarda ishtirok etgan o‘zbekistonlik sambochilar to‘rtta vazn toifasida to‘rtta medalga sazovor bo‘lishdi. Shuningdek, mazkur sport turi Olimpiya o‘yinlari dasturidan o‘rin olishga yaqin turibdi. Bu esa sambo ham mamlakatimizda ahamiyatli sport turlaridan biriga aylanib borayotganidan darak berib turibdi.
21 yanvar kuni Milliy olimpiya qo‘mitasida O‘zbekiston sambo assosiasiyasining navbatdan tashqari hisobot-saylov konferensiyasi tashkil etildi. Unda Osiyo sambo ittifoqi prezidenti Alamjon Mullayev, O‘zbekiston sambo assosiasiyasi mutasaddilari, assosiasiyaning viloyat bo‘limi vakillari va murabbiylar ishtirok etishdi.
Konferensiya davomida assosiasiya raisi Ravshan Ahmedjanov so‘zga chiqib, bungacha amalga oshirilgan ishlar, qo‘lga kiritilgan yutuqlar, kamchiliklar haqida gapirdi. Ammo, bu bilan to‘xtab qolmaslik, bundanda katta marralarni zabt etish lozimligini ta’kidladi. Buning uchun assosiasiya moddiy-texnik bazasini yaratish, sportchilarni rag‘batlantirishga alohida e’tibor qaratish kerakligini aytib o‘tdi.
Shundan so‘ng kun tartibiga ko‘ra, assosiasiya raisi lavozimiga Alisher Alimov nomzodi ilgari surildi. Yig‘ilish ishtirokchilari bir ovozdan A.Alimov nomzodini qo‘llab-quvvatlashdi.
O‘zbekiston sambo assosiasiyasiga rais etib saylangan Alisher Alimov so‘zga chiqar ekan, O‘zbekistonda samboni yanada rivojlantirish, mamlakatimizda nufuzli musobaqalarni tashkil etish yo‘lida hamjihatlikda ish olib borish lozimligi, rejalari haqida gapirdi. O‘z navbatida, bildirilgan ishonch uchun barchaga o‘z minnatdorchiligini bildirdi.
Ma’lumot uchun, Alimov Alisher Rixsibayevich 1979 yilning 25 aprelida tavallud topgan. Tadbirkor. Oilali. 4 nafar farzandi bor. Toshkent davlat texnika universitetida bakalavr, Bornmut xalqaro maktabida magistr bosqichida tahsil olgan.
Shuningdek, bungacha assosiasiya raisi sifatida faoliyat olib borgan Ravshan Axmedjanov o‘z ishini bosh kotib lavozimida davom ettiradigan bo‘ldi.