«Bavariya»ning sobiq yarim himoyachisi Aryen Robben Chempionlar Ligasi doirasida myunxenliklar va Madridning «Real» jamoalari o‘rtasida bo‘lib o‘tadigan bahsdan kutayotgan natijalari bilan o‘rtoqlashdi. Robben faoliyati davomida har ikki jamoada to‘p surganini, shu sababli o‘yin qanday o‘tishini ko‘pchilikdan ko‘ra yaxshiroq baholay olishini qayd etdi. Faxriy futbolchi hozirgi vaqtda «Bavariya» «Real»dan ustun ekanligini ta’kidladi, biroq bu yarim finalga chiqish uchun yetarli bo‘lmasligi mumkinligiga urg‘u berdi.

«Bu hali ham o‘sha — «Real Madrid». Murabbiy ham xuddi shu gapni aytishi kerak: ularga qarshi 90 yoki 95 daqiqa davomida hushyor va diqqatli bo‘lishingiz shart. Hatto siz: «Biz 2:0 hisobida g‘alaba qozonyapmiz, hammasi joyida», deb o‘ylayotgan bo‘lsangiz ham, ular hech qayerdan gol topib kelishlari mumkin. Futbolda o‘yin hech qachon [vaqtidan oldin] tugamaydi. Madrid bunga eng yaxshi misoldir», — dedi Robben Yahoo Canada Sports nashriga.

Dastlabki uchrashuvda «Bavariya» safarda 2:1 hisobida g‘alaba qozongan edi. Javob o‘yini chorshanba kuni, 15 aprel sanasida bo‘lib o‘tadi.