Yozda Madridning «Real» klubi bosh murabbiyni o‘zgartirishi mumkinligi haqida xabarlar tarqalmoqda. «Qaymoqranglilar» rulida Alvaro Arbeloaning o‘rnini Andoni Iraola egallashi mumkin.

Seshanba kuni Iraola mavsum yakunlanganidan keyin «Bornmut»ni tark etishi rasman e’lon qilindi. Uning boshqaruvidagi jamoa ajoyib natijalar ko‘rsatmoqda va ayni damda kuchli ligalar ichida mag‘lubiyatsiz o‘yinlar seriyasi bo‘yicha eng yaxshi ko‘rsatkichga ega bo‘lib turibdi. Shu sababli, Iraola yozda yuqoriroq darajadagi klubga o‘tishi kutilmoqda.

Transfermarkt nashri Iraola faoliyatini davom ettirishi mumkin bo‘lgan klublar ro‘yxatini e’lon qildi. Ushbu ro‘yxatdan quyidagi jamoalar joy olgan: «Real Madrid», «Manchester Yunayted», «Chelsi» va «Atletik Bilbao».

Hozirda «Bornmut» Angliya Premyer-ligasi turnir jadvalida 11-o‘rinda borayotgan bo‘lsa-da, Iraolaning ish uslubi grand klublar e’tiborini tortgan. «Real» rahbariyati Arbeloa o‘rniga aynan mana shunday progressiv murabbiyni olib kelish imkoniyatini ko‘rib chiqmoqda.