O‘zbekiston futbol assosiasiyasi Olimpiya terma jamoasi bosh murabbiyligiga asosiy nomzod bo‘lgan Lyubinko Drulovich bilan muzokaralar olib borayotgani haqida avval xabar berib o‘tgandik.   Bugun Milliy olimpiya qo‘mitasida Umid Ahmadjonov hamda serbiyalik mutaxassis Lyubinko Drulovich uchrashuv bo‘lib o‘tdi hamda Drulovich bilan 1 yilga mo‘ljallangan shartnoma imzolandi. Agar O‘zbekiston olimpiya terma jamoasi Tokio-2020 yo‘llanmasini qo‘lga kiritsa, shartnoma muddati Olimpiada yakuniga qadar uzaytiriladi.   "O‘zbekiston olimpiya terma jamoasi oldiga Tokio-2020 yo‘llanmasini qo‘lga kiritish vazifasi qo‘yilgan. Umid qilib qolamizki, Siz boshchiligingizda tarixiy natija qayd etib, terma jamoamiz Olimpiadaga yo‘llanmani qo‘lga kiritadi. Maqsadimiz, shunchaki Olimpiada yo‘llanmasini qo‘lga kiritish emas, balki ushbu musobaqada munosib ishtirok etish hisoblanadi. Buning uchun Milliy olimpiya qo‘mitasi va O‘zbekiston futbol assosiasiyasi tomonidan barcha sharoitlar yaratib beriladi. Ish boshlashdan avval Milliy terma jamoamiz bosh murabbiyi Ektor Kuper bilan uchrashib, fikr va tajriba almashib olishingiz ham mumkin. 

Shuningdek, Superligada qatnashayotgan klublar murabbiylari ham Siz bilan yaqin hamkorlikda ish olib borishadi. Vaqt yo‘qotmaslik uchun hozirda Olimpiya terma jamoasi bilan tajribali mutaxassisimiz Ravshan Haydarov ish olib bormoqda. Terma jamoa ayni paytda Antaliyada tayyorgarlik ishlarini olib boryapti. Haydarov ham Sizning shtabingizdan joy olib, hamkorlikda ishlaydi. O‘ylaymanki, bir tanu bir jon bo‘lib harakat qilsak, albatta o‘z maqsadimizga yetamiz. O‘zbekistonga xush kelibsiz!" - dedi MOQ prezidenti Umid Ahmadjonov serbiyalik mutaxassis bilan muloqot chog‘ida.

  "O‘zbekistonda ish boshlayotganimdan juda xursandman. Biz birgalikda oldimizga qo‘yilgan vazifani uddalaymiz. Buning uchun yetarlicha tajribaga egamiz, deb o‘ylayman. Yuqorida to‘g‘ri ta’kidladingiz, agar bir oila bo‘lib ishlaydigan bo‘lsak, albatta Olimpiada yo‘llanmasini qo‘lga kiritamiz. Bunga ishonchim komil", - deya o‘z fikrlarini bildirib o‘tdi Lyubinko Drulovich.   Ma’lumot uchun:   Lyubinko Drulovich Fuqaroligi: Serbiya Tug‘ilgan sanasi: 11 Sentyabr 1968 (50 yosh) Murabbiylik darajasi: UYEFA "PRO" diplomi egasi (2007 yil) Eng katta yutug‘i: Serbiya U-19 terma jamoasi bilan Yevropa chempionatida g‘oliblikka erishgan   Murabbiy sifatida erishgan yutuqlari: 1. Angola Superkubogi G‘olibi – "Agosto" FK 2010-2011  2. Yevropa U-19 Chempionati g‘olibi – Serbiya 2013 3. "Partizan" FK bilan Yevropa ligasi ishtirokchisi - 2015-2016 4. BAA U-19 bilan final qismiga yo‘l olgan - 2017 yil    Shaxsiy yutuqlari: Serbiyada yilning eng yaxshi murabbiyi – 2013 yil