Osiyo kubogida dastlabki finalchining nomi aniq bo‘ldi. Yaponiya terma jamoasi, kutilmaganda, Eronni yirik hisobda mag‘lub etdi.

Birinchi bo‘limda hisob ochilmadi. Ikkinchi bo‘limning 56-daqiqasida fors himoyachilarining xatosidan so‘ng "samuraylar" hisobni ochishdi: Minamino chap qanotdan yetkazib burgan uzatmani Osako bosh bilan darvozaga joylab qo‘ydi. Keyrush shogirdlari hali o‘ziga kelib olishmasidan avval avstraliyalik hakam Kris Bit Eron darvozasi tomon penalti belgiladi. VAR tizimi yordamida u o‘zining qarori to‘g‘ri ekaniga ishonch hosil qildi. Yana o‘sha Osako bu safar 11 metrli jarima zarbasini golga aylantirdi.

Forslar katta kuch bilan oldinga tashlanishdi. Ammo Yaponiya raqibga xavfli vaziyat yaratish uchun hech qanday imkoniyat bermadi. Qo‘shib berilgan daqiqalarda esa Genki Xaraguchi eronliklar darvozasiga uchinchi golni urib, o‘yinga batamom nuqta qo‘ydi.

Yaponiyaning finaldagi raqibi ertaga bo‘lib o‘tadigan BAA - Qatar uchrashuvidan keyin aniq bo‘ladi.

Osiyo kubogi, yarim final
Eron – Yaponiya 0:3 (0:0)
Gollar: 0:1 – 56 Osako, 0:2 – 67, penalti Osako, 0:3 – 90 Xaraguchi.
Eron – Beyranvand, Puraliganjiy, Hojisafiy, Muhammadiy, Kanonizodagon, Amiriy (Ansarifard, 58), Ibrohimiy, Jahonbaxsh (To‘rabiy, 71), Dejaga (Quddus, 71), Rizoyyan, Azmun.
Yaponiya – Gonda, Yosida, Tomiyasu, Nagatomo, Endo (Shiotani, 60), Xaraguchi, Shibasaki, Minamino, Doan (Ito, 89), Sakai (Muroya, 73), Osako.
Ogohlantirishlar: Amiriy (24), Ibrohimiy (44), Sakai (46).