Осиё кубогида дастлабки финалчининг номи аниқ бўлди. Япония терма жамоаси, кутилмаганда, Эронни йирик ҳисобда мағлуб этди.

Биринчи бўлимда ҳисоб очилмади. Иккинчи бўлимнинг 56-дақиқасида форс ҳимоячиларининг хатосидан сўнг "самурайлар" ҳисобни очишди: Минамино чап қанотдан етказиб бурган узатмани Осако бош билан дарвозага жойлаб қўйди. Кейруш шогирдлари ҳали ўзига келиб олишмасидан аввал австралиялик ҳакам Крис Бит Эрон дарвозаси томон пенальти белгилади. VAR тизими ёрдамида у ўзининг қарори тўғри эканига ишонч ҳосил қилди. Яна ўша Осако бу сафар 11 метрли жарима зарбасини голга айлантирди.

Форслар катта куч билан олдинга ташланишди. Аммо Япония рақибга хавфли вазият яратиш учун ҳеч қандай имконият бермади. Қўшиб берилган дақиқаларда эса Генки Харагучи эронликлар дарвозасига учинчи голни уриб, ўйинга батамом нуқта қўйди.

Япониянинг финалдаги рақиби эртага бўлиб ўтадиган БАА - Қатар учрашувидан кейин аниқ бўлади.

Осиё кубоги, ярим финал
Эрон – Япония 0:3 (0:0)
Голлар: 0:1 – 56 Осако, 0:2 – 67, пенальти Осако, 0:3 – 90 Харагучи.
Эрон – Бейранванд, Пуралиганжий, Ҳожисафий, Муҳаммадий, Канонизодагон, Амирий (Ансарифард, 58), Иброҳимий, Жаҳонбахш (Тўрабий, 71), Дежага (Қуддус, 71), Ризойян, Азмун.
Япония – Гонда, Йосида, Томиясу, Нагатомо, Эндо (Шиотани, 60), Харагучи, Шибасаки, Минамино, Доан (Ито, 89), Сакаи (Муроя, 73), Осако.
Огоҳлантиришлар: Амирий (24), Иброҳимий (44), Сакаи (46).