Sir emaski, karate jahonda o‘z o‘rnini mustahkamlab bormoqda. Sportning ushbu turi 2020 yilgi Olimpiya o‘yinlari dasturidan o‘rin olgani ham buning isbotidir.
Shu boisdan yoshlarimiz kelajakda sog‘lom, baquvvat bo‘lishlari, yurtimiz dovrug‘ini xalqaro arenalarda yuksaklarga ko‘tarish uchun ham karate bilan shug‘ullanishmoqda.
O‘zbekiston Milliy Olimpiya Qo‘mitasi va O‘zbekiston karate Milliy federasiyasi tomonidan sportning ushbu turini rivojlantirish, uni aholi orasida yanada ommalashtirish yo‘lida ish olib borilmoqda.
Yosh avlodni sportga qiziqtirishda esa jahon yulduzlari bilan uchrashuvlar, ular ishtirokidagi master-klasslarning ahamiyati katta.
Shu munosabat bilan sportchilik vaqtida ko‘plab sovrinlarni qo‘lga kiritgan, murabbiy sifatida jahon va Yevropa chempionlarini tarbiyalagan, bugungi kunda karate yo‘riqchisi (instruktori) bo‘lib ishlayotgan mashhur Xasin Xaddad O‘KMF rahbariyatining taklifiga ko‘ra O‘zbekistonga tashrif buyurdi.
Mutaxassis Islom Karimov nomidagi Toshkent xalqaro aeroportida kutib olindi. Rejaga binoan u yurtimizda terma jamoamiz a’zolari, yosh karatechilarimiz uchun master-klass o‘tkazadi. Sportchilarimiz chempionga o‘zlarini qiziqtirgan savollar bilan murojaat qilishlari mumkin bo‘ladi. Bu esa o‘z navbatida Olimpiya oilasi a’zosiga aylanayotgan karatechilarimiz uchun haqiqiy tajriba maktabi bo‘lishi shubhasiz.
