«Real»ning germaniyalik yarim himoyachisi Toni Kroos yaqinda nemis nashrlaridan biriga intervyu berib, klubning birinchi davrada yo‘l qo‘ygan xatolari va hozirgi holati xususida fikr bildirdi. Tan olingan futbolchining alohida ta’kidlashicha, qimmatli ochkolar boy berilgan bo‘lsada, «Madrid»da sovrinlar uchun kurashish uchun hali imkoniyat yetarli. Toni shuningdek, jamoa futbolchilariga yana yaqinlashgan jismoniy tayyorgarlik bo‘yicha murabbiy Antonio Pintusning roliga ham to‘xtalib o‘tdi.
- Nihoyat, bir necha oyga cho‘zilgan xavotirli holat biroz tarqaldi va «Madrid»da mavsumni muvaffaqiyatli yakunlashga umid tug‘ildi. Aytingchi, shaxsan sizga xayrli intihoga ishonch hamrohmi?
- Tushuning, hamma qatori biz ham omadsiz davrdan himoyalanmaganmiz. Ha, La-liganing start bosqichida ko‘p ochko yo‘qotdik, oddiy aytganda, raqiblarga shunchaki, sovg‘a qildik. Xayriyatki, endi omadsizlik ortda qoldi. So‘nggi yillardagi ishtirokimizdan shunday xulosaga keldimki, biz ajoyib jamoada to‘p suryapmiz. Har qanday vaziyat - muvafffaqiyatli davrda ham, omadsizlikka yuz tutgan paytda ham olg‘a intilishdan to‘xtamaymiz. Deylik, hozir 2 frontda g‘oliblik uchun kurash olib borayotganimiz barchamiz uchun ajoyib ilhom manbaidir. Albatta, yakunda sovrinlar yutish uchun bor imkoniyatlarni ishga solamiz.
- Qiziq, jamoa nimaning hisobiga birdaniga o‘zgardi?
- Har bir g‘alaba jamoaning qudratiga nisbatan ishonchni oshiradi. Ishlarimiz yurishmay qolgan vaqtlarda ham izlanishdan to‘xtamadik. Birinchi davrada haddan ortiq xatolarga yo‘l qo‘yganimizni tushunib turibmiz. Muhimi, ularni takrorlamaslik. Shuni unutmaslik kerakki, ko‘zlangan maqsadga erishish yo‘lida bor kuch-mahoratimiz va imkoniyatlarni safarbar etishimiz talab etiladi. «Real»ning so‘nggi yillardagi zafarlari ana shu haqiqatni yaqqol isbotlaydi. Misol uchun, avvalgi mavsumda chempionlik shohsupasiga chiqishdan barvaqt umid uzgandik, hattoki, mo‘’jiza ham yordam berolmasdi. Lekin shunda ham kurashga chanqoq edik. Chunki nimagadir erishishimizga ishonardik. Aynan shu ishonch evaziga YECHLda zafar quchdik.
- Sizningcha, muvaffaqiyat kaliti nimada?
- Buni hozir yaqqol ko‘rish mumkin: aksar jamoadoshlarim birinchi davraga nisbatan ajoyib sport formasiga chiqib olishdi. Biz uchun eng muhimi shu.
- Antonio Pintusning jamoadagi roli haqida nima deysiz?
- U qaysidir ma’noda biz bilan hamisha hamnafas. Antonio bunga qadar, ya’ni Zidan davrida jamoa a’zolarining jismoniy holati uchun mas’ul edi. Biroq Lopetegi o‘z mutaxassisini olib kelgach, Pintusning ta’siri ancha pasaydi. Shubha yo‘q, o‘yinchilarning jismoniy holati muvaffaqiyatning asosiy omillaridan biri hisoblanadi. Afsuski, so‘nggi haftalarda tarkibimizdagi bir qator yigitlar jarohatlanishdi. Yo‘q, bu borada jismoniy tayyorgarlikka mas’ul yangi mutaxassisni ayblash fikridan yiroqman. Biz uchun eng muhimi - futbolchilarni yuksak jismoniy darajaga olib chiqa oladigan kishining jamoada bo‘lishi. Uzun mavsumni bir maromda o‘tkazish anchayin mushkul vazifa, xotirjamlik bilan jiddiy tayyorgarlik ko‘rishning iloji yo‘q. Chunki o‘yinlar taqvimi o‘ta tig‘iz. Bunday sharoitda har qanday futbolchiga alohida e’tibor qaratish kerak. Hozirda umumiy vaziyat yomon emas. Ammo ba’zan omadsizliklar kuzatiladi, baribir. Jamoada Xesus Valyexoga o‘xshagan yoshlar ko‘p. Xususan, Xesus - chinakam professional, o‘z vazifasini risoladagidek ado etadi. Lekin tez-tez shikastlanayotgani ham haqiqat...
- 2018 yil poyoniga yetgach, yengil tin olgandirsiz...
- Shunday deyish mumkin: Rojdestvo arafasida Klublar o‘rtasidagi jahon chempionatida ishtirok etdik, keyin 5-6 kun dam oldik va yangi yilning 3-sanasidan La-liga bahslariga qaytdik. Hozir qandaydir xulosa chiqaradigan payt emas, oldimizda yo‘lning hal qiluvchi bosqichi turibdi. Ammo gap ortda qolgan yil haqida borar ekan, uni futbolchi hayotiga qiyoslash mumkin: parvozlar, pasayishlar... 2018 yil aynan shu jihati bilan yodda qoldi, qiziqarli o‘tdi.
- Yil shuningdek, musobaqalarga boy bo‘ldi, to‘g‘rimi?
- Albatta! Asosiysi, shaxsan men hayotdan, futboldan zavq olishda davom etyapman. Ha, omadsizliklar ham hayotning bir bo‘lagi. Agar tegishli xulosa chiqarishni bilsang, hattoki, omadsizlik ham muvaffaqiyatga erishishda yordam beradi.
