O‘zbekiston futbol assosasiasiyasi tomonidan mamlakatimizda bolalar futbolini rivojlantirish va uni ommaviylashtirish maqsadida ko‘plab musobaqalar, festivallar va turnirlar  o‘tkazib kelinmoqda.    Jumladan, O‘FA hamda Xalq ta’lim Vazirligi o‘rtasidagi imzolangan Memorandumga asosan  umumiy o‘rta ta’lim maktablari o‘quvchilari o‘rtasida mini-futbol (futzal) bo‘yicha “O‘FA KUBOGI” musobaqasi tashkil etildi. Mazkur musobaqa 5 bosqichda o‘tkazilishi ko‘zda tutilgan bo‘lib, hozirgi kunga kelib musobaqaning 4ta bosqichi o‘z nihoyasiga yetgan. O‘tkazilgan 4ta bosqich davomida jami 130 mingdan ortiq o‘quvchi-yoshlar musobaqalarga jalb qilinganini alohida ta’kidlab o‘tish kerak.   Bugun 12 fevral kuni poytaxtimizdagi "O‘zbekiston" sport majmuasida "O‘FA Kubogi" final uchrashuvi bo‘lib o‘tdi. Finalda Qashqadaryo va Toshkent shahri jamoalari o‘zaro kuch sinashishdi. Murosasiz kechgan bahsning asosiy vaqti 4:4 hisobidagi durang bilan yakuniga yetdi. Navbat penaltilar seriyasiga yetdi. Penaltilar seriyasida omad Toshkent shahri jamoasiga kulib boqdi.    Final o‘yinidan keyin musobaqa g‘olib va sovrindorlarini taqdirlash marosimi o‘tkazildi. Taqdirlash marosimida O‘FA va Xalq ta’limi vazirligi mutasaddilari qatnashishdi.    "O‘FA Kubogi" bronza medali sohiblari Namangan va Navoiy viloyati jamoasi a’zolariga planshet va ryukzaklar taqdim qilindi. 2-o‘rinni egallagan Qashqadaryo jamoasi futbolchilari kumush medal va velosipedlar bilan taqdirlandi. Birinchi o‘rin egalari Toshkent shahri jamoasi a’zolariga Kubok, oltin medallar va PlayStation 4 sovg‘a qilindi. Shuningdek, musobaqaning eng yaxshi o‘yinchisi, darvozaboni va to‘purari alohida sovrinlar bilan taqdirlandi.